O nacionalismo e independentismo, contra a Constitución
Anova denuncia que se nega a Galicia como nación, O BNG di que "non serve" para a soberanía e Nós-UP sinala que foi concedida por unha "ditadura militar".
Por Galicia Confidencial | Compostela | 06/12/2012 | Actualizada ás 16:17
As principais forzas nacionalistas e independentistas galegas estan disconformes coa actual Constitución española. Aseguran que "non é útil" para as necesidades de Galicia coma pobo nin para os dereitos laborais e sociais dos cidadáns.
Anova asegura que a actual Constitución "nega a Galicia como nación" e denuncia que os que piden "máis debotos" para a Carta Magna, "violana un día si e outro tamén". "No día en que se celebra a Festa da Constitución Española, Anova - Irmandade Nacionalista quere reiterar a convicción de que o benestar da maioría social galega require a plenitude dos dereitos individuais e colectivos como pobo", sinala nun comunicado.
Por iso, aposta, desde a loita social e as institucións, "pular pola liberdade, igualdade e fraternidade para a cidadanía e polo exercicio da soberanía plena para a nosa nación". Así, aclara que a "liberación nacional e social son indisociábeis nunha nación sen estado".
"Non serve"
Por outra banda, o portavoz nacional do BNG, Guillerme Vázquez, afirmou este xoves que a Constitución española "non serve para resolver os problemas" de Galicia porque a "soberanía é a chave para a conquista da Galiza que soñamos e á que temos dereito”.
Nun acto celebrado polo BNG no que se pedía máis soberanía, Vázquez destacou que “hoxe non temos nada que celebrar e si moito que reivindicar”. "o nacionalismo galego non o apoiou a Constitución de 1978 porque tiña máis de continuísta que de rupturista e polos límites que impuña ao recoñecemento xurídico-político das nacións do Estado, e xa que logo da soberanía nacional”, sinalou.
O líder do BNG destacou que a soberanía das nacións, a democracia e os dereitos das clases populares "non atopan amparo nesta Constitución”. "Hoxe, 34 anos despois, nada temos que celebrar e si moito que reivindicar: a soberanía, a democracia, os dereitos que non atopan abeiro nin protección nesta constitución”, apuntou.
Foi "imposta"
Tamén a organización Nós-UP denunciou que a Constitución española foi concedida pola "ditadura militar" e "unilateralmente imposta ao povo galego e a outros povos igualmente submetidos a umha soberania espanhola".
Esta formación insiste en que a Carta Magana é o resultado da "concessom do poder ditatorial nacional-católico" e que foi posible grazas ao papel de forzas reformistas como o PSOE e o PCE, "as suas posiçons opositoras para se integrarem no sistema de liberdades limitadas e vigiadas que deu continuidade ao projeto imperialista e capitalista espanhol de sempre".
Nós-UP insiste en que a saída da crise pasa pola "superaçom do modo de produçom capitalista" no que se sustenta a actual monarquía española e, por iso, pide o "rejeitamento dun texto constitucional que impom graves restriçons de dereitos sociais e económicos fundamentais.
