Notarios habilitan un sistema de apoderamento por sede electrónica para facilitar o voto por correo

O Consello Xeral do Notariado puxo a disposición do Goberno un sistema de apoderamento a través da sede electrónica notarial para facilitar ao máximo o voto por correo en Galicia e o País Vasco ante as circunstancias excepcionais derivadas da pandemia do coronavirus.

O Consello Xeral do Notariado explica que este sistema axilizará enormemente este servizo para que os cidadáns poidan exercer o dereito fundamental ao voto.

Así mesmo, os notarios reiteraron a súa dispoñibilidade para a autorización dos oportunos poderes electorais, tanto no domicilio dos cidadáns como, se se acepta a súa proposta, dixitalmente, co fin de facilitar o voto por correo.

"De acollerse esta iniciativa, que se atopa plenamente operativa, os cidadáns terían a posibilidade adicional de outorgar estes poderes por videoconferencia", explica o Consello, que detalla que, no caso de que non dispuxesen de certificado electrónico, o notario procuraríalles gratuitamente e para este só uso o dispositivo electrónico adecuado.

Con este servizo, "desenvolvido sen custo ningún para o erario público, os notarios destacaron que buscan expresar o seu compromiso "para coa sociedade e as institucións públicas".

"A intervención notarial, reforzada con este sistema que ofrece á sociedade, permitiría atender a un maior número de persoas, evitando desprazamentos e riscos", subliña o Consello, que lembra que "todos estes poderes electorais son por disposición legal completamente gratuítos".