Por Europa Press / Redacción | SANTIAGO DE COMPOSTELA | 07/06/2020 | Actualizada ás 17:38
O presidente da Xunta, Alberto Núñez Feijóo, dixo que o seu Goberno "non comparte" a fórmula de repartición do fondo de 16.000 millóns non reembolsable porque considera que "penaliza ás comunidades autónomas que xestionaron mellor a pandemia" da COVID-19 e pediu xestionar a contía "de forma autónoma".
Así, explicou que "só se financian as persoas ingresadas en hospitais e en UCI", polo que no caso de Galicia "quedan fóra os miles de persoas" diagnosticadas con COVID-19 que foron atendidas nos seus domicilios e "as 350 camas" das residencias de anciáns que foron medicalizadas para non mandar os maiores aos hospitais ou ás UCIs.
Pero, a pesar destas críticas, si recoñeceu que "algunhas cousas si se están tendo en conta": "De momento estamos mal. Un pouco menos mal que hai semanas, é certo, pero seguimos sen a proporcionalidade que nos corresponde". Por iso, e a esar de que valorou que "algunhas cousas" reclamadas desde Galicia "si se están tendo en conta", cre que a cantidade consignada para a Xunta aínda "está moi afastada" da "que lle corresponde por poboación protexida" fronte ao coronavirus.
Así o explicou Feijóo durante a rolda de prensa posterior á videoconferencia de líderes autonómicos co presidente do Goberno, Pedro Sánchez, quen lles trasladou algúns cambios nos criterios de repartición do fondo, de modo que a poboación de cada comunidade terá agora máis peso.
En concreto, o presidente comunicoulles que 9.000 millóns destinaríanse a gastos sanitarios; 2.000 millóns para un fondo de Educación; e outros 5.000 millóns serían para compensar a caída de ingresos derivada do parón económico. Pero destes últimos, 800 millóns irían compensar a diminución da facturación dos servizos de transporte, como metro, proximidades ou autobuses interurbanos.
BAIXAR O IVE DO TURISMO
En plano económico, o titular do Executivo galego reclamou a redución do IVE para o sector turístico ata o 31 de decembro do próximo ano, é dicir, durante o que resta de 2020 e todo o 2021. A modo de exemplo, suxeriu a baixada do 10 ao 4 por cento --o tipo superreducido-- o imposto de valor engadido en servizos como a hostalaría, os balnearios e a restauración.
"Estou convencido de que isto non vai diminuír a recadación fiscal, senón que a vai a incrementar", explicou Feijóo, posto que confía en que, unha vez baixen os prezos no sector, o consumo "aumentará" e iso levará a "recuperar o emprego".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.