O litoral norte de Galicia superou a media de precipitacións do ano hidrolóxico
As precipitacións acumuladas desde outubro ata o 4 de agosto en España superan nun 14% o valor normal.
Por Europa Press / Redacción | MADRID | 07/08/2020 | Actualizada ás 12:53
As choivas acumuladas no conxunto do Estado no que vai de ano hidrolóxico, desde que comezou o 1 de outubro de 2019 ata o 4 de agosto, superan nun 14 por cento o seu valor normal para este período, xa que choveu unha media de 660 litros por metro cadrado, fronte aos 581 litros por metro cadrado que son o valor medio normal no conxunto de España, segundo informou a Axencia Estatal de Meteoroloxía (AEMET). En Galicia, foi o litoral norte o que máis chuvia rexistrou.
Ademais, na última semana, do 29 de xullo ao 4 de agosto as precipitacións afectaron ao terzo norte e á metade este peninsulares, á illa de Mallorca e ás Pitiusas e ao norte das illas da Palma e Tenerife.
En concreto, superáronse os 10 litros por metro cadrado ao longo da cornixa cantábrica, o sistema Ibérico, Cataluña, zonas do interior de Castelló e de Valencia e no sur da provincia de Xaén.
Por zonas, acumulan máis choivas do normal en case 10 meses transcorridos do ano hidrolóxico en todo o territorio salvo no cuadrante suroeste peninsular, na metade oeste de Madrid e este de Ávila, nalgunha área no interior de Castela e León e do litoral norte galego, nas Pitiusas e no arquipélago canario.
