Tensións ata o último momento no PP sobre a Presidencia do Parlamento galego
Feijóo revalida a súa confianza en Santalices para presidir a Cámara e sitúa a Porro de secretaria. O sector de Ourense e o de Vigo, presionaron para colocar aos seus candidatos.
Por Europa Press / Redacción | SANTIAGO DE COMPOSTELA | 07/08/2020 | Actualizada ás 14:15
O presidente da Xunta en funcións e do PPdeG, Alberto Núñez Feijóo, revalidou a súa confianza no veterano político e deputado pola provincia de Ourense, Miguel Santalices, quen repite deste xeito á fronte do Lexislativo galego. E faino logo de manter a tensión ata o último minuto e con presións por parte de certos sectores do seu partido, tanto do ourensán como do vigués.
Faino acompañado na vicepresidencia por Diego Calvo, presidente do PP coruñés e o cal xa ocupou este cargo tamén na pasada lexislatura, cando tamén se especulaba se seguiría a súa carreira na Administración autonómica, despois de ser delegado territorial nesta provincia.
A novidade nos postos da Cámara é Corina Porro, experimentada política viguesa --aínda que nada en Ferrol-- que foi 'rescatada' polo agora presidente da Xunta en funcións para dirixir a delegación territorial de Vigo na pasada lexislatura, para o que deixou o Consello Económico e Social (CES), institución que presidiu entre 2011 e 2019.
TENSIÓN
Os nomes que votaron os 42 deputados do PPdeG non se coñeceron ata o fío das 11,00 horas, hora para a que estaba convocada a sesión constitutiva da Cámara, e que, como é habitual, celebráronse con aplausos dentro da sala de reunión dos populares.
Os deputados foron chegando á reunión de grupo a partir das 10,00 horas pero gardaron silencio sobre o seu futuro e mesmo, como o propio Santalices, asegurou que ata que comezase a reunión non sabía se seguiría á fronte da primeira institución de Galicia.
Apenas se puido interpretar como pista da posibilidade dun papel protagonista de Corina Porro, a quen antes da reunión púidolla ver co deputado --e unha das persoas de confianza do presidente-- Álvaro Pérez subindo polas escaleiras que conducen á área de goberno do Pazo do Hórreo.
O encontro saldouse pasadas as 11 horas e ao saír da reunión escoitáronse algún "parabén" a Diego Calvo, o que predicía que seguiría no órgano reitor. Feijóo evitou desvelar a decisión nese momento: "imos votar".
DIRECCIÓN DO GRUPO PARLAMENTARIO
En canto á dirección do Grupo Parlamentario, Pedro Puy seguirá como portavoz, como o é desde 2011 cando substituíu ao ribeirense Manuel Ruiz Rivas, e contará con tres viceportavoces: Miguel Tellado, secretario xeral do partido, xunto con Elena Candia e Paula Prado.
