Gayoso, premio ao mellor presentador das autonómicas
O condutor de “Luar”, Xosé Ramón Gayoso, vén de ser elixido como Mellor presentador de programas autonómicos pola Academia de las Ciencias y las Artes de Televisión.
Por GC Tendencias | Santiago | 11/04/2013 | Actualizada ás 09:51
O consello da Academia, que preside Manuel Campo Vidal, deu a coñecer este galardón na categoría de Autonómicas, que se suma aos recoñecementos das outras 20 categorías que se destacan nos 15 Premios Iris.
Gayoso, que cumpre nesta temporada 20 anos á fronte de “Luar” sendo líder de audiencia en Galicia, sinalou estar moi satisfeito e engadiu que este “é un premio para todos os comunicadores e para toda a televisión, porque eu me acordo de todos os compañeiros neste momento. Momento moi agradable e moi doce e a disfrutalo e a seguir traballando”.
O codirector e presentador de “Luar” recollerá este galardón en recoñecemento a todos estes anos de traxectoria profesional, nos que realizou un espazo musical e de humor único no seu xénero, que abrangue cada semana arredor das tres horas de emisión en directo.
O total dos 15 Premios Iris elíxense entre máis de 200 candidaturas presentadas polas canles de televisión, produtoras e profesionais. O consello da Academia seleccionou ademais, no apartado de Autonómicas, á Mellor presentador/a de Informativos (Natividad Melendre, de CyLTV Noticias), Mellor ficción (Tornarem, de TV3), Mellor programa de actualidade (Madrid Directo, Telemadrid), Mellor programa de entretemento (Tiene Arreglo, Canal Sur) e Mellor informativo (Aragón Noticias 1).
A gala de entrega dos 15 Premios Iris da Academia de Televisión terá lugar o próximo 25 de abril no Gran Casino Aranjuez. Esta xornada coñeceranse tamén os gañadores das restantes 20 categorías, que se escollen cos votos dos académicos.
