Por Galicia Confidencial | Ourense | 28/09/2020 | Actualizada ás 10:17
Amigas das Árbores denuncia a falta de acción por parte das autoridades galegas para evitar a erosión dos montes queimados. Declaran tamén que os acuíferos perto das áreas calcinadas están recollendo a cinsa do chan, arrastrada pola choiva. “Estivemos onte --sábado- na Ermida, Rebordechau na Serra de San Mamede, no Macizo Central Ourensán e o "Chapapote do monte" vai monte abaixo arrastrando cinsa, terra, restos orgánicos e facendo caborcos” sinalan desde a asociación. Por iso, un grupo de membros da entidade e voluntarios comezaron a rexenerar con palla algúns dos leitos dos ríos afectados polos incendios.
Alertan que o arrastre de materia orgánica, o arranque e posterior arrastre da capa esencial do chan está acabando nas correntes de auga. “No caso do Alto Arnoia contaminando e estragando o ecosistema fluvial deste afluente do Miño”.
Amigas das Árbores tamén denuncia que en montes do Xurés-Gerês, de Queixa, de Cualedro, de Manzaneda, de Vilariño de Conso e outras zonas moi castigadas polos lumes deste verán, está pasando o mesmo “o "chapapote" monte abaixo sen que caseque ninguén faga algo, centos de hectáreas todo calcinado”. Así, desta maneira relatan que a terra nesas áreas quedará “inservible para unha morea de anos, danos nada doados de reparar”.
Reclaman medidas urxentes e imprescindibles para evitar a erosión. Por iso indican ás autoridades que é necesario comezar a restauración inmediata dos montes calcinados. Piden tamén axudas ás poboacións afectadas.
Engaden que o pasado sábado 26 de setembro os apicultores e gandeiros das zonas queimadas estaban avaliando os danos. Ademais de que “tamén había batidas de caza, vehículos todo-terreo ao chou”. E sinalan que a veciñanza informou de que “non viron aínda o persoal da Xunta de Galicia avaliando os danos ou facendo traballos nas zonas afectadas”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.