Antonio Fontenla: " Os ERTE son un auténtico salvavidas para o mantemento das empresas e dos postos de traballo"
Antonio Fontenla foi reelixido por sexta vez como presidente da Confederación de Empresarios da Coruña. Máis de dúas décadas á fronte do empresariado coruñés que teñen visto entrar e saír gobernos e dúas crises económicas. Defensor do libre mercado e da reforma laboral aplicada polo Goberno Rajoy, cre que a crise da COVID axudará a impulsar as TIC e valora positivamente as iniciativas económicas da Xunta coa que asinou un documento xunto aos sindicatos, para manter o diálogo social.
Por Moncho Mariño | Santiago de Compostela | 03/10/2020 | Actualizada ás 22:00
-Sexto mandato na Confederación coruñesa, un sexto mandato que algúns verán como algo excesivo, outros dirán todo o contrario. Non obstante, vostede que ofrece agora para este novo período que abre na CEC?
Efectivamente inicio o sexto mandato á fronte da Confederación coruñesa e o fago coa ilusión e coas gañas do primeiro día. A miña reelección supón que tanto eu como o meu equipo de goberno fixemos as cousas ben, o que provocou que as empresas, por estar satisfeitas coa xestión desenvolvida durante estes anos, apoiasen masivamente a miña candidatura.
-Estima que o sistema económico, industrial e produtivo de Galicia está desfasado, que
necesita unha nova política?
Toda España, non só Galicia, precisa dunha maior capacidade industrial, xa que desta
forma se melloraría tanto a empregabilidade como a propia calidade do emprego.
- Que plans ten ou que plans quere presentar aos seus colegas da Confederación para
facer fronte á situación creada pola COVID na provincia?
Creo que o COVID-19 crea tres problemas que afectan directamente ás empresas; por
un lado, o sanitario, e por outro, o negativo impacto na liquidez e no propio emprego.
Por iso é necesario que traballemos xuntos na procura de superar unha situación tan
preocupante como a que vivimos.
A miña reelección supón que tanto eu como o meu equipo de goberno fixemos as cousas ben
-Cal é o sector máis afectado polas medidas sociosanitarias dentro da provincia? Ese
sector podería recuperarse de maneira máis rápida que outros?
A crise é global e polo tanto todos os sectores produtivos están afectados, principalmente os relacionados coa industria turística, a hostelería e o comercio, así como as pemes e o colectivo de autónomos. Eses sectores son, sen dúbida, os máis prexudicados e os que máis van tardar en recuperar a normalidade.
-Algúns sectores opinan que é o momento de apostar por novas iniciativas, novas maneiras de traballo e relación entre empresario e traballador. Cre que pasada a pandemia e a crise económica, haberá un cambio radical na concepción empresarial en Galicia?
A crise provocada polo COVID-19 nos plantexa ao tempo retos e oportunidades. Un deles é o relacionado cos sistemas de produción vencellados á robótica e á revolución dixital. Estas cuestións provocarán, por suposto, cambios importantes na concepción das empresas e darán paso a novas iniciativas empresariais. Para iso ten que axustarse as novas necesidades creadas tras a pandemia. Trataríase, en definitiva, de apostar por empresas máis modernas e competitivas.
É necesario que traballemos xuntos na procura de superar unha situación tan
preocupante como a que vivimos
-Estima o sector empresarial que é moi necesario facer cambios de cara a unha renovación da oferta, é dicir, ademais de sectores clásicos, apertura de novos retos como intelixencia artificial, computación etc?
Por suposto que sí. Como dixen anteriormente, a dixitalización, a computación, a intelixencia artificial, en definitiva a revolución dixital, están a dar paso a unha profunda renovación na estrurura das empresas do noso país.
-Por que non houbo unha maior aposta por estes sectores ata o momento?
Os cambios veñen cando teñen que vir. É decir, cando chega o seu momento e as condicións coxuntarais así o aconsellan. Acabamos de pasar a crise de 2008 e cando crecíamos por riba da media europea e nos estábamos recuperando da mesma, chegou a COVID, o que provocou un impacto descomunal na economía que provoca que para saír desta situación sexa necesario apostar por novas fórmulas que faciliten unha rápida e efectiva recuperación.
-Se ben o turismo é un sector clave, cre que ese mesmo sector en Galicia está excesivamente ligado ao Camiño de Santiago ou non?
O Camiño de Santiago é un activo turístico trascendental para a nosa Comunidade. Pero non é o único. Certo é que nos axuda de xeito moi importante a darnos a coñecer. Non obstante, non debemos esquencer que Galicia dispón dun potencial turístico, tanto no eido cultural como no relativo á natureza, de primeira magnitude que non debemos desaproveitar.
-Comparte as políticas económicas que está desenvolvendo o Goberno central de cara a evitar a caída da economía española en xeral? Cre que os ERTE agora mesmo son a solución para o empresariado?
O Goberno, como non podía ser doutra maneira, ten por obxectivo frear e evitar a caída da economía. E faino coa mellor das vontades. Partindo desa premisa, claro que comparto a maioría das súas decisións, sobre todo aquelas que están consensuadas no marco do diálogo social, como é o caso dos ERTE, que son un auténtico salvavidas para o mantemento das empresas e dos postos de traballo.
Chegou a COVID, o que provocou un impacto descomunal na economía que provoca que para saír desta situación sexa necesario apostar por novas fórmulas que faciliten unha rápida e efectiva recuperación.
-A Xunta pon en marcha un programa en liña para asesorar de maneira gratuíta a autónomos, empresas e comercios para a época postCOVID. Participou a CEC nesta iniciativa? Cal é a opinión da mesma que ten Vd?
Co Goberno galego mantemos unha interlocución fluida e permanente. Participamos das súas iniciativas económicas e polo tanto valorámolas positivamente. Precisamente hai poucos días que asinamos, xunto cos sindicatos, un documento para incentivar o diálogo social, tan importante como é para traballar na recuperación económica e a vertebración social do noso país.
-Cre que os fondos da UE poderán ser abondo para manter a flote a economía dentro
da Unión? Cre que España debía ter máis diñeiro (recibiu 140.000 millóns de euros)?
A solución adoptada é tan boa como necesaria. Por iso, espero e desexo que sirva para
mantener a flote tanto a economía española como a europea. Entendo que os 140.000
millóns que vai recibir poden ser unha primeira fase das axudas previstas que, em caso
de necesidade, estou seguro se ampliarán.
O Goberno, como non podía ser doutra maneira, ten por obxectivo frear e evitar a caída da economía. Partindo desa premisa, claro que comparto a maioría das súas decisións
-Ve posibles outras vías de financiación para evitar o colapso económico?
Seguramente existan outras vías de financiamento, pero o certo é que o aprobado pola
UE é un plan que posibilita que o noso país dispoña de 140.000 millóns de euros, dos
que 77.000 son a fondo perdido. Deste xeito, se abordará o problema da falla de
liquidez. É de subliñar que esta é a primeira vez que a UE aporta diñeiro a fondo perdido.
E é evidentemente uhna boa noticia.
-Desde o punto de vista empresarial, as medidas do Ministerio de Traballo sobre a
reforma laboral do Goberno Rajoy parécenlle axeitadas ao momento ou considera que
están erradas? Por que?
No momento en que se fixo, a reforma laboral foi unha decisión moi acertada. Aí están
os indicadores económicos para avaliar o antedito. A reforma modernizou as relacións
laborais e nos fixo crecer moi por riba da media da Unión Europea.
A falta dunha maioría suficiente para gobernar e os pactos multipartidarios provocan certa inestabilidade e iso ten unha incidencia negativa na nosa economía.
-A situación política do Goberno central, as reiteradas idas e vidas sobre os orzamentos do Estado, que seguen prorrogados, como lle pasan factura ao empresariado?
O empresariado quere disciplina orzamentaria, o que supón un aliciente para os
investidores. Evidentemente prorrogar os Orzamentos do Estado non é o mellor para lograr a reactivación económica.
-Considera inestable a situación política en España?
Nós queremos estabilidade e iso é o que desde sempre vimos revindicando. A falta dunha maioría suficiente para gobernar e os pactos multipartidarios provocan certa inestabilidade e iso ten unha incidencia negativa na nosa economía.
-E en Galicia, cre que esta nova maioría absoluta de Feijóo dá a impresión de modelo político sólido?
O que creo é que os resultados electorais son os que son, e que, en consecuencia, os mesmos crearon na nosa terra o que todos desexamos: estabilidade política e social.
-Cal é o modelo económico que mellor se axustaría ás necesidades empresariais en Galicia?
Sen dúbida o que temos, a economía de libre mercado.
