O presidente do TSXG: "Hai xente que precisa vivenda cando outras están en mans de entidades que non as usan"

O presidente do Tribunal Superior de Xustiza de Galicia (TSXG), José María Gómez y Díaz-Castroverde, referiuse este domingo ás okupacións ilegais de vivendas. Segundo dixo, é unha problemática que "ten unha orixe que non é de agora", senón que hai que remontarse á crise do 2008: "Xorde certa cuestión social, que é ata que punto pode haber xente que poida necesitar unha vivenda cando hai vivendas en mans de entidades que non fan uso delas".

A pesar diso, afirmou que "diminuíron" as demandas civís referidas a okupacións de vivendas de persoas físicas e entidades sen ánimo de lucro. Outra cousa, explicou, son "os delitos de usurpación e violación de morada", que "non só é o que concierne a okupacións, senón tamén a outro tipo de situacións que se producen todos os días".Así a todo, considera que "si" hai mecanismos xurídicos suficientes para facer fronte a esta problemática.

CRISE SANITARIA

Tamén considera dunha dureza "suficiente" as sancións que se impoñen aos cidadáns por incumprir as medidas sanitarias contra a COVID-19, pero reclama ás autoridades "claridade" na normativa.

Nunha entrevista concedida este domingo á Cadea Ser, recollida por Europa Press, Gómez y Díaz-Castroverde fixo súas as palabras pronunciadas polo presidente do Tribunal Supremo, Carlos Lesmes, na apertura do ano xudicial: "Dicía que é necesario clarificar a normativa sanitaria e eu creo que é moi importante".

Sobre as medidas ditadas polas autoridades para conter ao coronavirus, que deben ser ratificadas pola xustiza en tanto que afectan a dereitos, Gómez y Díaz-Castroverde afirma que aínda que aquelas restricións individuais xa eran "habituais", a "novidade" agora son as que se adoptan de forma "colectiva".

Ante este panorama, considera "acertado" que dentro das últimas reformas legais se atribúe aos tribunais superiores de xustiza a potestade da súa validación, porque "permitirá a unificación de criterios".

Con todo, o presidente do TSXG advertiu que, sen dubidar da "importancia" da saúde pública, esta "non pode priorizarse sobre o estado de dereito". "Por isto é imprescindible que os xuíces interveñan no control destas medidas cando se traten de limitacións de dereitos fundamentais", incidiu.

"DIMINUCIÓN" DE ACTIVIDADE XUDICIAL

Na entrevista na Cadea Ser, Gómez e Díaz-Castroverde recoñeceu que hai unha "diminución" de asuntos presentados nos xulgados non só en Galicia, "senón en toda España". Iso si, prevé que para os últimos meses do ano haberá "un aumento de asuntos na xurisdición social e na orde mercantil" para a que, segundo asegurou, o TSXG está "ben preparado".

Finalmente, sobre o xuízo do accidente ferroviario de Angrois, cuxa fase de instrución acaba de volver pecharse, o presidente do TSXG non se aventurou a dar unha data para a súa celebración para non "entrometerse na actuación dos xuíces". "A miña opinión nesta cuestión é garantir que se celebre con toda a transparencia e todos os medios adecuados para que poida coñecerse e contemplarse que ten a mesma transparencia que outros xuízos", dixo.