Só o 20% dos galegos saíu a cafetarías, cinema ou teatro entre abril e xuño
A confianza dos consumidores con relación ás actividades de lecer, continúa o documento, sitúase "nos peores niveis desde 2010".
Por E.P. | SANTIAGO DE COMPOSTELA | 28/10/2020 | Actualizada ás 19:46
Só o 20,1% da poboación galega saíu a cear, a cafetarías, ao cinema ou ao teatro entre os meses de abril e xuño, aínda a pesar do inicio do período de desescalada tras o confinamento, o que apunta os efectos deste período no sector cultural da Comunidade, que viviu "as súas cifras máis baixas da última década".
Así o recolle o informe de 'Conxuntura estatística do ámbito cultural. Outubro de 2020' que acaba de facer público o Observatorio da Cultura Galega, servizo dependente do Consello da Cultura Galega. O documento tamén explica que, superado o confinamento, o sector da cultura mantivo unha pequena recuperación, "pero está lonxe dos niveis anteriores ao comezo da pandemia".
A confianza dos consumidores con relación ás actividades de lecer, continúa o documento, sitúase "nos peores niveis desde 2010". Os resultados do terceiro trimestre deste ano, que se corresponderon co período de 'desescalada, revelan que nesa época só o 20,1% da poboación galega puido realizar actividades de lecer, como saír cear, as cafetarías, ir ao cinema e ao teatro en Galicia.
En canto ás expectativas manifestadas pola cidadanía, melloran a partir deste período, dado que soben do 19,4% ao 36,1% os fogares que pensaron facer unha destas actividades de lecer no próximos tres meses.
ÁMBITO ECONÓMICO
No relativo aos prezos dos produtos culturais, as cifras experimentan "unha baixada acusada en conxunto", o que dá conta dunha "situación de debilidade xeral". Con todo, na análise dos datos por produtos, pódese ver que esa situación está "moi influída" polo comportamento dos equipos audiovisuais, fotográficos e de procesamiento de información. O resto de produtos e servizos culturais apenas varía no que vai de ano e mesmo prensa, libros e artigos de papelería experimentaron un avance dun 1,4%.
Segundo os resultados deste estudo, a realidade empresarial da cultura "mantivo un comportamento diferente con respecto ao resto de sectores culturais". O ritmo de creación de empresas culturais foi mellor para o sector da cultura (que só baixou un 6,2%), que con respecto ao conxunto da economía (un 19,6%).
Pola contra, afectoulle máis a baixada do comercio exterior que a outros sectores. As importacións de produtos culturais caeron un 65,3% entre xaneiro e setembro e as exportacións un 60%. As caídas, que foron moi pronunciadas no mes de abril, iniciaron unha recuperación nos meses de xuño e xullo para volver descender despois.
Con respecto ao emprego, despois dos grandes descensos dos meses de marzo e abril, as empresas culturais "iniciaron unha recuperación". A pesar disto, ese incremento foi lixeiramente menor no ámbito da cultura (+3,4%) que no conxunto do emprego (+3,6%).
