Por Europa Press / Redacción | Santiago de Compostela | 29/10/2020 | Actualizada ás 15:49
O director da CRTVG, Alfonso Sánchez Izquierdo, mostrou a súa disposición a continuar no cargo mentres o Parlamento de Galicia non se expoña a súa substitución nun posto que ocupa desde o ano 2009. "Eu non me vexo esgotado, senón todo o contrario", respondeu Sánchez Izquierdo na súa comparecencia ante a Cámara na comisión de control sobre o ente público, onde a deputada do BNG Olalla Rodil puxo en cuestión a continuidade do director da CRTVG, "perpetuado no cargo" a través dun "subterfuxio legal" como, di, é a lei de acompañamento aos orzamentos.
"Se vostede me ve esgotado, delle saída a buscar un novo director", apuntou Sánchez Izquierdo, que defendeu que o "importante son os feitos" como a posta en marcha dun "plan de accións e actuacións" para o ente público de cara aos próximos meses.
"Por eses novos escenarios vai pelexar a dirección", engadiu despois de asegurar, en resposta ás críticas lanzadas polos grupos da oposición (PSdeG e BNG), que a Lei de medios está "moi cumprida" e que os "dous ou tres puntos claves" que non son achacables á dirección da CRTVG.
MEMORIA ANO 2019
Sánchez Izquierdo compareceu este xoves ante a comisión de control da CRTVG para debullar a memoria do ano 2019, da que destacou que "o 96%" dos contidos emitidos "foron de orixe galega".
Deste xeito, segundo os datos ofrecidos polo director de rádioa televisión pública, a produción propia ocupou o 50,6% da grella da TVG e a segunda canle (G2), mentres que a produción propia externa foi do 45,95% e a allea, do 4,35%.
Outro dos aspectos que puxo sobre a mesa foi a contribución á "internacionalización" do audiovisual galego e o seu "posicionamento" nas plataformas de contidos baixo demanda e o panorama cinematográfico, con especial relevancia no éxito alcanzado pola película 'O que arde', o filme en galego máis taquilleiro da historia e que figura como preseleccionada para representar o cinema español nos Óscar.
Como exemplo diso, sinalou que a serie 'O sabor das margaridas' figurou entre as 10 series de fala non inglesa máis vistas da plataforma Netflix ou a compra dos dereitos de emisión de 'Serramoura' por canles de Rusia e Estados Unidos e, máis recentemente, por HBO.
Así mesmo, Sánchez Izquierdo tamén se detivo no proceso de "renovación dixital" emprendido no ente público ao longo dos últimos anos e que viviu en 2019 "un punto de inflexión" coa creación do servizo 'G24.gal'.
Así, aumentaron entre un 6 e un 9 por cento as visitas á páxina web da CRTVG, que xa se realizan unha de cada catro veces desde as redes sociais e en dispositivos móbiles.
Todo este proceso de "adaptación" dos profesionais e de "tensións" que soportou a "estrutura tecnolóxica", permitiu, segundo Sánchez Izquierdo, que o ente público "dese resposta" ás necesidades informativas dos galegos durante os primeiros meses da pandemia.
CRÍTICAS DA OPOSICIÓN
Durante a súa quenda, os grupos da oposición, representados polas deputadas Olalla Rodil (BNG) e Noa Díaz (PSdeG) criticaron o balance ofrecido polo responable do ente público, ao que afearon que "trate de vender como logros cousas que non son tal".
A parlamentaria nacionalista detívose na caída das cifras de audiencias, que se sitúa "xa por baixo" da barreira "dos dous díxitos" con menos do 10% de media, o que reflicte, segundo Rodil, que existe "un problema para captar público e retelo", esencialmente entre os colectivos máis novos.
Na súa resposta, Sánchez Izquierdo negou isto último e recalcou que a TVG "aguanta" mellor que a media a caída das audiencias pola fragamentación derivada da TDT e o nacemento das plataformas de contidos baixo demanda, á vez que asegurou que os datos da principal auditora (Kantarmedia) reflicten un "incremento clarísimo" das audiencias nas persoas de entre 23 e 45 anos.
Pola súa banda, a deputada socialista Noa Díaz tachou de "pueril" e "eufemística" a memoria presentada polo director da CRTVG, ao que acusou de "vender" como melloras técnicas e creación de novos formatos "a adaptación lóxica aos novos tempos".
Así mesmo, censurou que Sánchez Izquierdo e o seu equipo "ignoren" as mobilizacións de traballadores que protestan pola "manipulación" e as "inxerencias" políticas nos servizos informativos, o que a levou a convidar o director da CRTVG a "pasear pola redacción" do seu medio "e polas rúas" para que "se dea conta de que están a tomar decisións tan equivocadas que poden levar ao descrédito" á entidade pública e que isto "sería o peor que lle podería pasar".
"Nunca escoitei o señor Feijóo nin me fixo chegar nin unha consideración sobre os contidos da CRTVG. Outra cousa é sobre a situación empresarial, pero ao redor dos contidos, nunca. Nada", aseverou Sánchez Izquierdo na súa quenda de peche.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.