Endesa será sancionada pola contaminación do Eume e terá que pagar os custes das obras

A conselleira de Infraestruturas e Mobilidade defende a actuación da Xunta.

Por Europa Press / Redacción | Santiago de Compostela | 10/11/2020 | Actualizada ás 18:08

Comparte esta noticia

O expediente a Endesa polo episodio de turbidez no río Eume por mor da xestión do encoro segue en tramitación e "analizarase o alcance da sanción", en palabras da conselleira de Infraestruturas e Mobilidade, Ethel Vázquez. Así se pronunciou nunha comparecencia no pleno do Parlamento na que tamén reivindicou modernizar " en tres semanas" a estación de tratamento de auga potable de Pontedeume, "para garantir a calidade da auga a todos os veciños", algo que o alcalde "non fixo".

Instalación de barreiras no río Eume, onde verteduras obrigaron a prohibir o consumo de auga en Pontedeume
Instalación de barreiras no río Eume, onde verteduras obrigaron a prohibir o consumo de auga en Pontedeume | Fonte: Xunta.

A pesar de que "son competencias municipais", Vázquez defendeu esa "solución" e contrapúxoa coa actuación do rexedor, do PSOE, que "non era capaz" de garantir o abastecemento de auga de calidade.

Ademais, a conselleira afirmou reforzar as inspeccións e analíticas no encoro e no río Eume tras o episodio de turbidez, a raíz do cal reivindica actuar "con contundencia" e "inmediatez" porque "ningunha agresión contra o medio ambiente pode quedar impune".

Na súa intervención, cualificou de "graves" os feitos, xa que afectaron o abastecemento de auga a Pontedeume, pero rexeitou xerar "alarmismo". Segundo avanzou a conselleira "a próxima semana entrarán en servizo ao 100%" estas obras de modernización da potabilizadora.

Ademais, dixo que a Endesa solicitaráselle "que asuma os custos das obras" e "non só das obras". "En analíticas nin lles conto o investimento que estamos a facer".

O pasado venres, en comisión parlamentaria, a directora de Augas de Galicia, Teresa Gutiérrez, atribuíu o episodio de turbiedade nas augas do río Eume que levou á prohibición do consumo durante varios días a mediados de outubro a un "proceso natural" causado por desprendementos de noiros en regatos afluentes do Eume que provocou "unha alteración importante" da calidade das augas "debido ao arrastre de sólidos".

"NOVO PARCHE?"

Por parte dos grupos, o deputado do BNG Ramón Fernández esixiu á conselleira un proxecto con "ambición" que pase pola "recuperación e dinamización" da zona, que, segundo dixo, está afectada pola actividade mineira de anos. O episodio de turbidez foi, na súa opinión, a "crónica dun desastre anunciado".

O socialista Pablo Arangüena acusou á titular de Infraestruturas de "desvergoña" e "elusión de responsabilidades", tras os reproches desta ao alcalde de Pontedeume. "Que desvergoña e que cara máis dura!", exclamou. Respecto diso, chamou a atención sobre que o río é "o núcleo" do parque das Fragas do Eume, antes de observar un "tic franquista" ao ser os conselleiros de Medio Ambiente dos gobernos de Alberto Núñez Feijóo "case todos enxeñeiros, agás Vázquez".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 picheleiro

Ramón Fernández sempre foi un dos defensores de Endesa