Pode o mercado do viño 'bio' axudar a fixar poboación nas zonas rurais?

"Sempre fun un emprendedor". Con estas palabras explica Carlos Vázquez Padín como pasou a formar parte do selecto grupo de persoas que están a lanzar propostas empresariais en plena pandemia de covid. O tudense puxo en marcha este ano Bodegas.bio, unha plataforma de venda online de viño ecolóxico que se configura como a "primeira" en todo o Estado con estas características, segundo destaca.

Padín, ex alcalde de Tui por Converxencia XXI e que se define a si mesmo como un "amante" do viño, explica que se lanzou a esta iniciativa tras apreciar un nicho de mercado que non estaba a ser atendido. E é que, segundo explica, aínda que o mercado do viño estea xa "maduro", "no nicho ecolóxico había espazo para un proxecto". Segundo relata, a día de hoxe Bodegas.bio segue a ser a única plataforma de 'marketplace' dedicada de xeito exclusivo á venda de viño producido de xeito ecolóxico; alén dalgunhas pequenas tendas xurdidas despois da iniciativa e "cun enfoque distinto".

FIXAR POBOACIÓN

O compromiso desta nova marca vinícola galega queda marcado máis alá dos propios procesos de produción, que segundo destacan implican unha "redución da pegada medioambiental". E é que esta pulsión ecolóxica déixase entrever tamén na distribución e comercialización da bebida, xa que as botellas parten directamente das adegas á mesa dos consumidores, sen intermediarios.

Por outro lado, a implicación de Bodegas.bio con este consumidor "cada vez máis consciente" da necesidade de manter e coidar o entorno queda reflectida tamén na contribución que pretende dar contra o problema demográfico. Neste aspecto, a plataforma de Padín, que suma xa 58 adegas de todo o Estado, pretende botar unha man ós pequenos produtores para fixar poboación en zonas rurais.

Aínda que o proxecto de Bodegas.bio leva rondando a Vázquez Padín dende 2016, non foi ata o ano pasado que o tudense, coa súa marcha da política, contou con tempo para lanzar esta iniciatia. Padín foi alcalde de Tui entre 2017 e 2019 cun partido liberal e galeguista fundado por el mesmo en 2009: Converxencia 21. "Sempre prefiro liderar algo novo, por pequeno que sexa, que integrarme como subordinado en algo máis grande", explica.