Xulgan a catro persoas que entraban a roubar en casas da Coruña cando se ausentaban os moradores

A sección segunda da Audiencia Provincial da Coruña xulgará o mércores, día 2, a catro persoas acusadas de formar parte dunha organización dedicada a subtraer diñeiro, xoias e outros efectos de valor de domicilios da Coruña, segundo informa o Tribunal Superior de Xustiza de Galicia (TSXG).

Por integración en grupo criminal e roubo, o Ministerio Público pide para dous presuntos integrantes do grupo catro anos e once meses de cárcere e, para os outros dous, cinco anos e oito meses de prisión.

Os feitos remóntanse a setembro de 2019 cando os acusados, segundo Fiscalía, se confabularon para cooperar entre eles na realización de subtraccións de diñeiro, xoias e outros efectos valiosos que puidesen atopar en diversos domicilios da cidade da Coruña e os seus arredores mediante a entrada nos mesmos.

Aproveitaban a momentánea ausencia dos respectivos moradores das casas, todo iso mediante o emprego de métodos que supuxesen o quebranto das diferentes medidas de seguridade e peche das vías de acceso dispostos en cada caso polos citados usuarios das vivendas.

"O reparto de papeis atribuíu ás dúas mulleres do grupo o control das idas e vindas dos moradores dos domicilios que pretendían asaltar e a provisión de información entre a veciñanza, facéndose pasar nalgúns casos por axentes comerciais de operadoras de telefonía", recolle o escrito fiscal.

Audiencia Provincial da Coruña.