Asociacións ecoloxistas tachan de "delirio" o transvase de augas contaminadas a unha balsa de Touro

A asociación ecoloxista ADEGA e a Plataforma pola Defensa da Ría de Arousa veñen de recurrir a decisión de Augas de Galicia de autorizar o transvase temporal das augas de tres regos da contorna da mina de Touro, con destino á balsa de Vieiro.

Este polémico proxecto, presentado a principios de 2019 pola empresa que xestiona a mina de Touro, Explotaciones Gallegas SL, supón o desvío temporal por uns 6 meses das augas contaminadas destes regos (Felisa, Portapego e Angumil) á balsa de Vieiro. Segundo Augas de Galicia, o obxectivo é “dar un pouco máis de marxe temporal” á empresa para redactar un proxecto definitivo de tratamento das augas contaminadas da mina.

Segundo Adega e a Plataforma, "tal xustificación é en si mesma un insulto", xa que Explotaciones Gallegas SL dispuxo "de máis de 30 anos" para solucionar os pasivos ambientais da mina e eliminar as "continuas verteduras de augas contaminadas" dende o complexo mineiro á bacía do Ulla e á ría de Arousa.  Pola súa banda, denuncian que a administración "tivo ese mesmo tempo" para esixir da empresa unha correcta restauración dos labores mineiros abandonados, cuxas balsas e entulleiras - lembran - non deixaron "en ningún momento" de verter augas ácidas.

Ademais, cualifican o proxecto dun "verdadeiro delirio", posto que van transvasar augas de tres regos contaminados a unha balsa mineira cunha "limitada capacidade" e que presenta "numerosas filtracións ao dominio público". "Trátase de mover a contaminación de sitio durante un tempo agochándoa baixo unha alfombra (a balsa) chea de buracos", denuncian. Desta maneira, o proxecto podería incorrer en varias ilegalidades, xa que supón unha dilución da contaminación "disfrazada" de transvase, cuestión expresamente prohibida pola Lei de Augas galega.

A propia temporalidade abre máis incertidumes: "cal será o destino das augas contaminadas logo de rematada a drenaxe temporal?", pregúntase Adega. "Queda claro que o que non se solucionou en máis de 30 anos non se vai facer en 6 meses". Así pois, tanto ADEGA como a PDRA lamentan que a administración se preste a este tipo de “solucións temporais” que non son máis que "chafalladas e malos parches", tachan.

"Se realmente a Xunta quixera contribuir a solucionar o problema da contaminación da mina, debería obrigar a concesionaria a presentar, con carácter previo a calquera autorización, o proxecto definitivo para o tratamento dos efluentes mineiros. Despois de 30 anos de incumprimentos e millóns de toneladas de contaminantes vertidos impunemente ao dominio público, non pode haber lugar para máis compoñendas", sentenzan.