A Radio Galega entrevista en español ao ex alcalde da Coruña para criticar o pacto "social-comunista" en Madrid
Francisco Vázquez foi moi duro contra o PSOE, partido polo que foi alcalde na Coruña durante 23 anos, polo seu pacto con Unidas Podemos e polos acordos con partidos "independentistas y pro terroristas".
Por Galicia Confidencial | Santiago de Compostela | 05/12/2020 | Actualizada ás 20:30
O espazo Galicia por Diante da fin de semana na Radio Galega, que conduce o xornalista Luis Ojea, realizou unha entrevista practicamente en español na canle pública a unha persoa --tal e como se pode escoitar aquí-- , o ex alcalde da Coruña, Francisco Vázquez, que coñece perfectamente o galego.
Ojea utilizou só o galego para presentar ao seu convidado. Un convidado ao que se lle preguntou na maior parte da entrevista sobre as políticas do PSOE e Unidas Podemos no Goberno central e os pactos con partidos nacionalistas e independentistas coma ERC ou Bildu.
De feito, Vázquez cargou duramente contra o goberno "social-comunista", a mesma terminoloxía que utilizan os dirixentes do PP e de Vox, para referirse ao goberno de Madrid. Unhas críticas que foron moi duras contra os actuais dirixentes socialistas, especialmente Pedro Sánchez, perto tamén os líderes galegos, aos que reprochou que pacten coas "mareas, co BNG, que es un partido independentista y anticonstitucional o con Podemos, que es un partido antisistema", dixo.
Durante a entrevista, o ex alcalde socialista da Coruña, Francisco Vázquez, dixo que "ve en perigo a Constitución "pola arremetida da fronte rupturista", como denomina ó goberno e os seus socios parlamentarios. Tamén dixo observar "unha operacion de derrube da monarquía porque é a garantía da legalidade constitucional e representa o dique de contención ante a involucion totalitaria e guerra civilismo que di percibir en España".
PRINCIPIOS REITORES DA CRTVG
A Lei 9/1984, de 11 de xullo, de Creación da Compañía da Radio-Televisión de Galicia e Modificación da Lei 9/1984, do 11 de xullo, de creación da Compañía de Radio-Televisión de Galicia (Lei 3/2002, do 29 de abril, de medidas de réxime fiscal e administrativo) recollen claramente, e en varios articulados, que unha das súas finalidades é a difusión da lingua galega.
Así, no seu artigo 1.1 xa se di que "atribúeselle á Compañía de Radio-Televisión de Galicia a misión de servizo público consistente na promoción, difusión e impulso da lingua galega". E no artigo 16 volvese a insistir en que entre os "principios que han de inspirar a programación dos medios xestionados pola Comunidade Autónoma de Galicia" está "o respecto á Constitución e ao Estatuto de Autonomía de Galicia e a promoción e difusión da Cultura e Lingua Galega, así como a defensa da identidade da nacionalidade galega".
A DERIVA DE FRANCISCO VÁZQUEZ
Vázquez, xunto con ex políticos como José Luis Barreiro, colaborador de La Voz, ou Roberto Blanco Valdés, vicepresidente da fundación Fernández Latorre de La Voz de Galicia, apareceron en varias campañas de entidade Libres e Iguales, que impulsa a ex dirixente do PP Cayetana Álvarez de Toledo.
As críticas furibundas de Vázquez ao PSOE xa veñen de lonxe. En 2014 deuse de baixa como militante do PSOE por discrepancia coa liña do novo PSOE porque, segundo di, pon en dúbida a Constitución e a transición democrática. Rexeita a Lei de Memoria Histórica, aprobada durante o mandato de José Luís Rodríguez Zapatero, que, na súa opinión, produciu unha ruptura do alicerce da transición que foi a reconciliación entre todos os españois, así como a recuperación do anticlericalismo do século XIX.
