Ethel Vázquez ao BNG: "En Pontevedra non teñen nin transporte urbano"

A conselleira de Infraestruturas e Mobilidade, Ethel Vázquez, mostrouse "sorprendida" de que o BNG criticase o plan de transporte público de Galicia cando, afirma, "onde goberna non fai absolutamente nada por melloralo". Como exemplo puxo a cidade de Pontevedra, que "non ten nin transporte urbano e están obrigados a telo".

En declaracións aos medios nun acto en Arteixo, a responsable autonómica destacou que o plan "facilita día a día os desprazamentos a todas as persoas e con mellores horarios e frecuencias" e denunciou, en referencia ao BNG, que "o fácil é falar do traballo dos demais".

Segundo Vázquez, Galicia é "a única comunidade autonómica" que modernizou" e "transformou" todo o transporte público e recriminou aos nacionalistas as críticas en información ou frecuencias das liñas. "Sorpréndeme enormemente porque o BNG onde goberna non fai absolutamente nada para a mellora do transporte público", engadiu.

PP

Por outra banda, o grupo local do PP de Pontevedra rexistrou este luns unha emenda á totalidade dos orzamentos elaborados polo goberno bipartito de BNG e PSOE por considerar que son "un corte e pega" dos anteriores". En rolda de prensa os concelleiros populares Rafa Domínguez e Gerardo Pérez Puga criticaron que "son uns orzamentos continuistas, practicamente un curta e pega dos anteriores, nos que non se ten en conta, nin figura, a crise xerada pola covid-19".

O portavoz do PP local, que reprochou que todas as propostas da súa formación fosen rexeitadas na elaboración das contas, censurou que "o documento non recolla axudas directas a autónomos, comercio local e hostalaría".

"Non conta coa eliminación e exención de taxas que pedimos, que vimos como o PSOE nun primeiro momento valorouna positivamente para daquela ser chamado á orde polo BNG; e non inclúe o incremento do gasto social que solicitamos, para así seguir sendo unha das capitais de España con menor investimento en Servizos Sociais", censurou.