Denunciadas 136 empresas de limpeza en Inspección do Traballo por incumprir o convenio

Os sindicatos CIG, CCOO e UXT denunciaron ante a Inspección de Traballo da Coruña a 136 empresas de limpeza da provincia pola "inaplicación" dun artigo do convenio colectivo que reserva para traballadoras a tempo parcial as "vacantes" que haxa para postos a tempo completo.

"O sector ten un número de contratos a tempo parcial moi elevado e esta é a única posibilidade que teñen as traballadoras de mellorar o seu traballo", explicou aos medios o representante da CIG, Paulo Rubido, ante a sede da entidade estatal, relacionando os incumprimentos coa negociación do convenio colectivo.

Segundo as centrais sindicais, a patronal pretende eliminar o mencionado artigo do convenio, o número oito, conxelar os salarios en 2020 e incrementalos un "ridículo" 0,8% este ano. "Os salarios aproxímanse cada vez máis aos do mínimo interprofesional", lamenta Rubido, reprochando que estas compañías "incrementaron a súa facturación" o ano pasado.

"Outras patronais poden estar afectadas pola crise da pandemia, pero esta non é así, é todo o contrario", reprochou o portavoz da CIG, que lembrou que son estas empresas as que realizan "tarefas de desinfección e higienización".

FOLGA

Os sindicatos anuncian mobilizacións e reunións con grupos políticos e non descartan convocar folga no sector, que aglutina a máis de 9.000 traballadoras na provincia da Coruña, nas próximas semanas, "co que pode representar para os centros de traballo, de saúde ou de educación", advirten.

Os sindicatos consideran que existe "marxe de negociación" pero piden diálogo á patronal, á que acusan de "mala fe". "O artigo oito non se toca e ten que haber incremento salarial para 2020", reclama Rubido.