A Xunta impulsa axudas por valor de 6 millóns de euros para contratar seguros agrarios
Os titulares de explotacións agrarias ou de acuicultura continental en Galicia poderán presentar as súas solicitudes dende o 1 de xaneiro ata o 15 de novembro.
Por E.P. | SANTIAGO DE COMPOSTELA | 14/01/2021 | Actualizada ás 14:02
O Diario Oficial de Galicia (DOG) publicou o 14 de xaneiro as bases reguladoras das axudas para o fomento da contratación do seguros agrarios, cuxa dotación, 6 millóns de euros aumentou un 20% respecto da do ano anterior.
Tal e como informou a Consellería de Medio Rural nun comunicado, concederá as axudas de forma directa aos agricultores e poderán beneficiarse delas os asegurados que sexan titulares de explotacións agrarias galegas, "sempre que subscriban pólizas de seguros de liñas agrícolas do plan 2021 e de liñas gandeiras dos plans 2020 e 2021" formalizadas este ano.
Tamén poderán recibir as axudas os titulares de explotacións de acuicultura continental e contémplanse, ademais, os seguros de retirada e destrución dos animais mortos nas explotacións.
Ademais, a formalización da correspondente póliza ou contrato de seguro por parte da persoa asegurada considerarase solicitude de axuda, "sempre que se realice dentro dos períodos estipulados pola normativa do plan anual vixente" establecido polo Ministerio de Agricultura, Pesca e Alimentación.
O prazo de presentación de solicitudes abarca desde o 1 de xaneiro ata o 15 de novembro, segundo a liña de seguro da que se trate e do tipo de produción asegurable.
