Galicia leva executados máis do 90 % dos pagos da PAC 2024

A Consellería de Medio Rural xa executou, a 8 de xuño, o 93 % dos pagos correspondentes á campaña da Política Agraria Común (PAC) 2024. Así, Galicia sitúase como a segunda comunidade autónoma en alcanzar o maior nivel de execución neste período. A tres semanas de finalizar os pagos desta campaña, que teñen que estar abonados o 30 de xuño, só catro comunidades autónomas se atopan por enriba do 90 % de execución, entre elas Galicia.

Actualmente hai sete comunidades entre o 70 % e o 80 %, mentres que cinco máis están por baixo do 70 %. Dentro do compromiso da Consellería de Medio Rural de executar os pagos da PAC en tempo e forma, lembran que o Goberno autonómico xa abonou o 100 % das axudas directas a finais do mes de maio, cun desembolso total duns 172,5 millóns de euros. A este orzamento das axudas directas deben engadirse os do pago de decembro de 2024 correspondente ás zonas con limitacións naturais, que son uns 17,3 millóns de euros.

As achegas directas da PAC inclúen as axudas básicas á renda para a sustentabilidade, a redistributiva complementaria, a axuda complementaria á renda para as persoas agricultoras novas, co obxectivo de favorecer a substitución xeracional; os ecorrexímenes, que son aquelas prácticas voluntarias que levan a cabo os agricultores para impulsar o rendemento ambiental e climático; e as achegas asociadas á produción.

Varias vacas leiteiras, da raza bovina frisoa, comen penso e cereais, nas instalacións dunha granxa | Fonte: Isabel Infantes - Arquivo