As bibliotecas comezan a pechar por falla de axudas
Este ano o orzamento dedicado a arquivos descendeu un 36,8% e o de bibliotecas públicas caeu un 39,5 %. A última en pechar foi a de Cabeiro, en Redondela.
Por Xurxo Salgado | Redondela | 13/08/2013 | Actualizada ás 20:30
A Golada, Monte Alto na Coruña e agora a de Cabeiro en Redondela. Son algúns exemplos do que está acontencendo coas bibliotecas públicas de Galicia que están comezando a pechar por falta de axudas. Son as primeiras institucións que sufren os duros recortes. Algunhas delas levan sen adquirir novos libros desde hai meses.
A Asociación de Arquiveiros, Bibliotecarios, Museólogos e Documentalistas de Galicia (Anabad-Galicia) destaca que os recortes nos orzamentos xerais da Xunta "supoñen a asfixia dos centros". Precisamente, os recortes sufridos neste 2013 son "altísimos, respecto ao xa escasísimo orzamento do ano 2012" e os do 2014 aínda son peor.
E é que este ano o orzamento dedicado a arquivos descendeu un 36,8% e o de bibliotecas públicas caiu un 39,5 %. "Nos arquivos recórtanse todas as partidas, e seguen sen abordarse os problemas crónicos de falta de espazo que lle impiden aos centros cumprir as súas funcións, ao non poder recibir transferencias", denunciou recentemente Anabad.
Pecha a biblioteca de Cabeiro, en Redondela
Unha situación que asfixia ás bibliotecas e arquivos, principalmente, aqueles de pequenos concellos ou barrios. Precisamente, o último en pechar foi a biblioteca de Cabeiro, en Redondela. O Centro Cultural denuncia que o goberno local, do PPdeG, débelles o pago de 1.200 euros anuais comprometidos coa anterior corporación.
Este centro denuncia nun escrito remitido ao concelleiro de Cultura de Redondela, Julio Alonso, que "dada a precariedade da nosa economía" ven abocados a pechar a súa biblioteca, que pon a disposición dos veciños uns 3.500 libros, puntos de lectura e computadores.
A biblioteca de Cabeiro é considerada unha "área de lectura municipal" xa que forma parte da Rede de Bibliotecas de Galicia, segundo indican desde o Centro Cultural da parroquia. Ata agora, unha subvención de 1.200 euros do Concello permitía manter o servizo.
"O ano pasado solicitóuselle ao antigo concelleiro (refírese ao popular Alberto Pazos, que abandonou a corporación para entrar no Parlamento de Galicia) polo menos esa cifra para cubrir ese gasto, pero con escusas foi pasando o tempo e seguimos sen recibir a subvención", quéixase na carta o presidente da Cultural de Cabeiro, Manuel Álvarez López, que considera que, ante a actual situación, teñen que fechar a biblioteca.
Outros peches
Non é o único centro pechado este ano por falta de pago dunha subvención. Precisamente, a principios de ano, era o Concello da Coruña, tamén do PPdeG, quen deixaba sen fondos a unha das bibliotecas máis importantes da cidade, a de Monte Alto. Unha situación que os grupos da oposición calificaron como unha medida política para "amordazar ao movemento veciñal".
Tamén fai un ano a biblioteca do municipio dezano de Agolada anunciaba o peche por falta de fondos. Pero neste caso, a loita de Leda, a bibliotecaria local, fixo que cambiara a situación. Primeiro redactou unha carta de protesta -"Xentiña indignada, a ver que vos parece a carta que escribín. Quen a asinaría". Logo promoveu unha petición pública de recollida de firmas en Change.org.
Todo isto chamou a atención de ANABAD-Galicia que saíu en defensa da biblioteca e da súa bibliotecaria. Finalmente a oposición municipal presentou a moción de seguir abríndoa polo menos algúns días e a alcaldía aprobouna. Conseguiuse que a biblioteca de Agolada teña, polo momento, outra "oportunidade". Unha situación da que, desgraciadamente, non poden gozar outras bibliotecas galegas.
