Feijóo esquece os incumprimentos de Rajoy con Ferrolterra e acusa a Sánchez da actual situación da comarca
Avisa da situación "crítica" de Ferrolterra.
Por Europa Press / Redacción | Cobas (Ferrol) | 26/02/2021 | Actualizada ás 20:56
O presidente do Partido Popular de Galicia, Alberto Núñez Feijóo, asegurou que "a situación industrial, social e económica das comarcas de Ferrolterra, Eume e Ortegal é crítica" e "tendente a empeorar", estado que atribúe ás decisións do Goberno central actual, aínda que esquenceu lembrar que o abandono da comarca débese a sucesivos gobernos, entre eles, os de Rajoy.
"Estamos ante a peor situación vivida por estas comarcas desde hai décadas. Non hai proxectos de futuro e non se cumpren os compromisos do presente, e por iso non imos calar e non imos mirar para outro lado. O que imos é a loitar por esta zona", manifestou.
O tamén presidente da Xunta pronunciouse deste xeito no Parador de Turismo de Ferrol, onde estivo acompañado do presidente provincial do PP, Diego Calvo, e do presidente local, José Manuel Rei Varela. Xunto a eles, reuniuse con rexedores e portavoces municipais populares no norte da provincia da Coruña para analizar o actual escenario.
Na súa intervención, Feijóo culpou ao Goberno central da situación, xa que "todas as decisións que toma van en contra dos intereses lexítimos da comarca".
