Os traballadores de RTVE en Galicia concéntranse contra a renovación "politizada" da súa cúpula

Traballadores de RTVE en Galicia saíron ás rúas das principais da cidades da comunidade este tres de marzo para protestar contra o "reparto de cromos" que, ao seu ver, está a ter lugar no proceso de renovación do consello de administración da corporación pública. A mobilización, convocada polo sindicato CGT, deixouse ver fronte ao centro territorial da radiotelevisión pública, no lugar compostelán de San Marcos, pero tamén ante os seus espazos de traballo en Lugo e A Coruña. 

Segundo apuntan dende o sindicato convocante, a mobilización ten por obxectivo expresar o "rexeitamento" dos traballadores da corporación en galicia ante o proceso de renovación do Consello de Administración de RTVE; que, segundo explican, culminou este luns coa publicación no BOE dos nomes dos novos conselleiros e conselleiras.

"Malia as promesas de despolitización da radio e a televisión públicas", apuntan, "unha vez máis as formacións políticas estatais optaron pola designación de cargos en base a cotas partidistas"; unha solución que non foi ben recibida polos traballadores do ente público. En liñas paralelas, critican que o proceso non tivera en conta un baremo máis obxectivo. "De nada serviron as promesas de impulsar un concurso público, baseado na traxectoria, mérito e capacidade dos candidatos, coa fin última de garantir a independencia de RTVE". 

Os traballadores que se veñen de sumar á mobilización critican así que a conformación do novo consello de administración tivera lugar como resultado do "reparto de cromos" entre grupos políticos; aos que acusan de establecer unha estratexia de continuidade co tan criticado sometemento dos medios públicos aos desexos do poder político.