Xibraltar apunta a Galicia polo auxe do contrabando de tabaco

A crise económica está reactivando o mercado negro de tabaco no Estado e Galicia volve a estar no punto de mira. Aproveitando a lea reactivada entre os gobernos español e británico a conta do rochedo xibraltareño, o xornal 'Panorama' publica un duro artigo do xornalista David Eade no que acusa aos contrabandistas galegos de beneficiarse da saída ilegal de miles de paquetes de cigarros por Xibraltar e outros puntos cara ao mercado español.

Nuñez Feijóo co narcotraficante e contrabandista Marcial Dorado | Fonte: El País

Eade recoñece que a saída ilegal de tabaco de Xibraltar por La Línea é incesante, "gústenos ou non", di. "Vaia á fronteira todos os días e verá homes e mulleres españois comprando cigarros que ocultan nos seus corpos para cruzar a España andando ou en bicicleta", describe o xornalista, quen acusa ás autoridades españolas de permitir este tráfico: "Eu seino, vostede tamén o sabe e, polo tanto, a Garda Civil tamén o coñece", denuncia Eade.

O "patio traseiro de Rajoy"

Con todo, ese non é o grande problema do tráfico ilegal de tabaco vía Xibraltar. Para David Eade, este fluxo incesante de consumidores españois de cigarros na fronteira "non ten nada que ver coa guerra contra o tráfico de tabaco". Porén, asegura que "o paquete de cigarros que se compran nun quiosco aquí [Xibraltar] é moi probábel que acabe no patio traseiro de Rajoy, en Galicia" pola reactivación das bandas criminais organizadas.

O tabaco en Xibraltar é máis barato que en España, polo que son moitos os españois que cruzan a fronteira para facerse con grandes cantidades. Como ben apunta Eade, "a compra dos cigarros aquí para o consumo persoal é legal; é só cando os compradores que cruzan a España superan o límite permitido cando se convirte en ilegal". E segundo o propio Eade, son "moitos" os policías e funcionarios de aduanas os que "teñen cicatrices recibidas nas batallas cos traficantes" que tentan introducir ilegalmente cantidades comerciais de tabaco en España".

Tabaco de contrabando incautado | Fonte: Garda Civil

Rexurdimento dos contrabandistas galegos

Segundo Eade, o auxe do pequeno contrabando de tabaco na fronteira entre Xibraltar e España estivo motivado pola crise económica española. O xornalista apunta que os cartos que reciben os pequenos traficantes pola venda de paquetes de cigarros "é todo o que teñen para poñer comida nas súas mesas ou pagar o aluguer". 

Porén, o fluxo do tabaco de contrabando está mudando e agora "todo indica que os que están comprando os cigarros" en Xibraltar en cantidades importantes para comercializalos en España "non son bares ou tendas locais, senón bandas criminais organizadas". 

"Segundo os expertos españois, este comercio está agora en mans dos tradicionais contrabandistas galegos", ou dito noutras palabras, "no propio patio traseiro de Rajoy, Galicia, de onde é oriúndo", insiste o xornalista británico. 

Eade observa un interese especial dos contrabandistas galegos para aproveitarse da crise económica e da alza dos prezos do tabaco legal. Os expertos, explica o xornalista, calculan que o 12 por cento do tabaco que se consume en España é de contrabando. "O motivo é simple: en tempos de dificultade económica o prezo dun paquete incrementouse de media dous de euros en tres anos" en España, polo que agora "os contrabandistas galegos están satisfacendo as necesidades dos fumadores" a través do tráfico ilegal.

O xornalista recorre a Hermelino Alonso, xefe do Servizo de Vixilancia Aduaneira en Galicia, para xustificar o seu argumento. Así, constata que se produciu un "rexurdimento dos vellos contrabandistas de tabaco galegos", pon en boca do funcionario. 

"Moitos deles están sen traballo, non teñen un emprego legal e, polo tanto, para obter ingresos comezaron de novo co contrabando de tabaco", explica Eade. Porén, e segundo Hermelino Alonso, os contrabandistas galegos mudaron os seus métodos de traballo e "na actualidade funcionan en grupos autónomos cuxos membros só se coñecen entre eles", sen existir contactos e redes entre os distintos clans.

Líderes en importación de tabaco americano

David Eade sinala que se ben Galicia é o "centro de operacións do contrabando de tabaco" en España, o produto chega vía Andorra, Canarias e Xibraltar pola fronteira con La Línea. "De feito", prosegue o xornalista, "hoxe os galegos son os líderes na importación de tabaco americano". 

No artículo tamén se referencia a José Antonio Vázquez Taín, o célebre xuíz de Santiago de Compostela pola súa loita contra o narcotráfico. Para este, e segundo apunta Eade, "é moi difícil acabar coas bandas de contrabando de tabaco en Galicia porque a actividade se desenvolve entre as vellas familias que coñecemos todos cara a cara" e que "historicamente mantiveron os seus contactos, coñecen os circuítos e levan mantendo este comercio durante moitos anos". 

"O xuíz tamén sinalou o feito de que unha grande cantidade do produto contrabando é agora transportado en colectores. De feito isto é así, e deixando a un lado Xibraltar e Andorra, a maioría do tabaco ilícito que chega a España faino a través dos portos de colectores e non a contagotas, como en La Línea. Estes colectores chegan a España en grande parte de China, doutras partes de Asia, de Oriente Medio e, ás veces, a través de África", explica o xornalista.

Investigar presuntos vínculos co PP

Para rematar o artigo, David Eade insiste en cargar contra o presidente de España, xa que lle parece "moi irónico que os cigarros que parten daquí probablemente terminan no patio traseiro de Rajoy", recalca de novo.

Eade considera que hai motivos para pensar en presuntos vínculos entre o Partido Popular e os traficantes, e entende que o xuíz que leva o caso dos pagamentos en 'B' de Luís Bárcenas a dirixentes do PP tería que "investigar se cartos das familias galegas do contrabando foron parar ás arcas ilícitas do PP. Non me sorprendería que así fose", conclúe con rotundidade.