A ministra Ribera di que a situación de Ence en Pontevedra "non ten nada que ver coa Lei de Cambio Climático"
Considerou que "o principal problema" de Ence é que ten recorrida a prórroga da concesión que lle foi concedida polo anterior Goberno do PP, estando así pendente da resolución dos tribunais.
Por Europa Press / Redacción | MADRID | 16/03/2021 | Actualizada ás 16:40
A vicepresidenta cuarta do Goberno e ministra para a Transición Ecolóxica e o Reto Demográfico, Teresa Ribera, asegurou que a situación da planta de pasta de celulosa de Ence en Pontevedra "non ten absolutamente nada que ver coa Lei de Cambio Climático" e pediu "non xerar unha confusión que non beneficia nin á xente nin aos traballadores".
En rolda de prensa tras o Consello de Ministros, Ribeira subliñou que "rotundamente non depende da Lei de Cambio Climático" e afirmou que "non hai ningunha instalación en Galicia nin en ningún outro sitio do litoral que se vexa afectada pola Lei de Cambio Climático".
Así, considerou que "o principal problema" de Ence é que ten recorrida a prórroga da concesión que lle foi concedida polo anterior Goberno do PP, estando así pendente da resolución dos tribunais.
"O que é importante é o que quere facer Ence nestes anos que ten por diante con respecto á concesión vixente", dixo, engadindo que o Goberno galego conta con "cuestións no radar" para o futuro da planta asociadas á actividade forestal, nas que o Executivo "estará encantado de acompañarlles".
