Convocadas as prazas das gardarías da Xunta para o curso vindeiro

O Diario Oficial de Galicia (DOG) publica este martes as ordes de convocatoria para a adxudicación de prazas nas escolas infantís (de 0 a 3 anos) dependentes da Axencia Galega de Servizos Sociais e do Consorcio Galego de Servizos de Igualdade e Benestar, integradas estas últimas na rede A Galiña Azul, para o curso 2021/22.

Desta forma, a Xunta abre a partir deste mércores e ata o próximo 12 de abril o prazo de inscrición para o curso 2021-22 nas 173 escolas infantís da rede autonómica, que pon a disposición das familias, segundo os datos da Consellería de Política Social, un total de 10.383 prazas.

De acordo cos números do departamento autonómico, son 41 prazas máis, resultado da entrada en funcionamento da escola infantil de Paderne de Allariz. Ademais, espera que ao longo do curso entre en funcionamento a ampliación na de Salvaterra de Miño. A consellería lembra, por outra banda, que o próximo curso será o segundo en que se aplique a gratuidade para segundos fillos e sucesivos.

Un neno xoga nunha escola infantil. XUNTA - Arquivo

DOCUMENTOS

Xunto aos requisitos, documentación, prazos, horarios e prezos, ambas as ordes establecen que as persoas que obteñan praza disporán de oito días contados desde o seguinte ao de publicación no DOG da resolución de adxudicación para presentar o impreso de matrícula debidamente cuberto xunto coa copia da cartilla de vacinación do neno.

Esta presentación poderase facer tanto a través da sede electrónica da Xunta como no centro no que obtivese o neno a praza. Tamén recollen, entre outros aspectos, a xestión das listas de espera, baixas, cocientes de nenos con necesidades específicas de apoio educativo e escolas de nova apertura. No caso da Axencia, a listaxe do DOG recolle oito centros na provincia da Coruña, cinco en Lugo, tres en Ourense e nove en Pontevedra (un total de 25). Mentres, a lista das xestionadas polo Consorcio (as da rede A Galiña Azul) conta con 146 en toda a comunidade.