A Xunta avanza na rehabilitación do Mosteiro de Santa María de Sobrado para crear un novo albergue
Por E.P. | SANTIAGO DE COMPOSTELA | 07/04/2021 | Actualizada ás 13:47
O vicepresidente primeiro da Xunta, Alfonso Rueda, visitou este mércores as obras de rehabilitación o mosteiro de Santa María de Sobrado, nas que a Administración autonómica inviste máis de 737.000 euros para a creación dun novo albergue.
Nun comunicado remitido aos medios, o departamento autonómico destaca que esta actuación contribuirá a pór en valor o Camiño do Norte, así como á recuperación deste edificio histórico declarado ben de interese cultural.
En concreto, un convenio coa orde cisterciense de Santa María permitiu pór en marcha as actuacións de acondicionamento do mosteiro para adaptalo ás características da rede galega de albergues públicos, da que pasará a formar parte unha vez terminados os traballos.
A reforma inclúe a renovación das instalacións do claustro dos peregrinos, unha das zonas do mosteiro destinada precisamente a albergue, con intervencións nos acabados e mobiliario, así como con melloras de accesibilidade e eficiencia enerxética. Tamén se acondicionou un espazo exterior para instalar un módulo de lavandaría e unha zona de lecer e descanso.
Deste xeito, conforme destacou a Xunta, os peregrinos que realicen esta ruta do Camiño Norte contarán cun novo servizo de acollida na última etapa antes de enlazar co Camiño Francés. A Xunta destacou que traballa para ter todo a punto para este Xacobeo dobre e, no caso do Camiño de Santiago, na creación de novas instalacións para os peregrinos e a realización de melloras nos actuais.
