A produción industrial galega repunta case un 5%, segundo maior aumento do Estado

Volve así a cifras positivas despois de catro meses consecutivos de retroceso. Atópase entre as mellores do Estado, onde descende un 5,2%.

Por E.P. | SANTIAGO DE COMPOSTELA | 09/04/2021 | Actualizada ás 10:49

Comparte esta noticia

A produción industrial galega repuntou un 4,8% en febreiro en comparación co mesmo mes do ano anterior, segundo os datos que publica este venres o Instituto Nacional de Estatística (INE). Este avance contrasta coa caída media do estado (-3,4%). De feito, supón a segunda maior subida entre comunidades, só por detrás de Cantabria (+12%), nun mes no que só hai incrementos en catro comunidades.

Así, a produción da industria galega volve a cifras positivas despois de catro meses consecutivos de retroceso interanual. O último dato de crecemento produciuse en setembro de 2020. A media do que vai de ano, xaneiro e febreiro, supón unha diminución do 0,1% no caso galego. Atópase entre as mellores do Estado, onde descende un 5,2%.

DATOS ESTATAIS

Produción industrial en febreiro de 2021 en Galicia. EPDATA
Produción industrial en febreiro de 2021 en Galicia. EPDATA | Fonte: Europa Press

O Índice Xeral de Produción Industrial (IPI) retrocedeu un 3,4% en febreiro en relación ao mesmo mes de 2020, moderando en 3,6 puntos a caída experimentada en xaneiro (-7%). Co descenso interanual de febreiro, a produción industrial encadea dous meses consecutivos de taxas negativas.

Todos os sectores rexistraron en febreiro caídas anuais da produción. O maior retroceso anotárono os bens de equipo, cunha diminución interanual do 9,4%, seguido dos bens de consumo duradeiro (-2,9%); os bens de consumo non duradeiro (-2,2%); os bens intermedios (-1,1%), e a enerxía (-1%). As actividades que máis recortaron a súa produción en febreiro foron a industria do coiro e do calzado, cun retroceso interanual do 27%,a fabricación doutro material de transporte (-17,4%) e a confección de pezas de vestir (-16,9%).

Pola súa banda, entre os ascensos interanuais, destacaron os avances da produción na industria da madeira e a cortiza (+5,6%) e na fabricación doutros produtos minerais non metálicos (+5,5%). Corrixida de efectos estacionales e de calendario, a produción industrial rexistrou en febreiro unha caída interanual do 2,1%, moderando en dúas décimas o retroceso de xaneiro (-2,3%).

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta