A Xunta anuncia a elaboración dunha Estratexia Galega de Minaría Sustentable
Di que o obxectivo é "camiñar pola senda da modernización tecnolóxica e a innovación, así como da economía circular".
Por Europa Press / Redacción | VIGO | 03/05/2021 | Actualizada ás 19:52
A Xunta anunciou este luns a elaboración dunha Estratexia Galega de Minaría Sustentable para orientar esta actividade nos próximos anos cara a un desenvolvemento económico, social e ambiental "máis eficiente e racional".
Así o trasladou a directora xeral de Planificación Enerxética e Recursos Naturais, Paula Uría, que mantivo unha reunión co Clúster do Granito no Porriño (Pontevedra) e visitou varias canteiras na zona.
Uría avanzou que a Xunta vai iniciar a elaboración desa Estratexia para avanzar na sustentabilidade desta actividade económica e industrial e puxo en valor a contribución do sector do granito no desenvolvemento de Galicia, con empresas que axudan a "fixar poboación e dinamizar a súa contorna".
Así mesmo, tamén destacou o papel da Fundación Centro Tecnolóxico do Granito, un "centro de referencia de innovación sectorial especializado", e lembrou que, no marco da colaboración entre a administración e este centro, trabállase na implantación dun selo de minaría sustentable e unha ecoetiqueta.
RETOS DO SECTOR
Segundo destacou a Consellería de Economía, Empresa e Innovación, un dos "principais retos" do sector mineiro é "camiñar pola senda da modernización tecnolóxica e a innovación, así como da economía circular". Por iso, subliñou, a introdución de instalacións innovadoras permite mellorar a calidade dos produtos e reducir custos.
Así, apuntou, a administración galega ofrece incentivos para loitar contra enfermidades profesionais mediante a aplicación de tecnoloxías innovadoras; por outra banda, a través do Inega, as empresas poden optar a axudas para actuacións de eficiencia enerxética.
