Hostaleiros e Xunta debaten ampliar o horario en bares que serven comidas
Tamén negocian a posibilidade de ampliar a capacidade en certos concellos.
Por Europa Press / Redacción | Santiago de Compostela | 11/05/2021 | Actualizada ás 16:59
Os representantes da hostalaría galega e a Xunta mantiveron este martes un novo encontro para analizar a situación do sector por mor da pandemia, no cal se esbozaron posibilidades para avanzar na desescalada dos establecementos. Entre elas, abriuse a porta a ampliar os horarios de bares que serven comidas ou tapas, así como a capacidade naqueles locais que se atopen en zonas de baixa incidencia, a condición de que empreguen os medidores de CO2.
Á reunión asistiron, por parte da Xunta, o vicepresidente primeiro, Alfonso Rueda, o conselleiro de Sanidade, Julio García Comesaña, e a conselleira de Emprego, María Jesús Lorenzana.
Entre outras cuestións, o sector expuxo ao Goberno galego algunhas medidas para avanzar na desescalada dos establecementos, propostas que deberán ser analizadas polo comité clínico pero que contaron con "boa disposición" por parte da Xunta.
Entre elas está a posibilidade de que aqueles bares que ofrezan pratos ou tapas, pero que non conten coa licenza de restaurante, poidan abrir tamén ata as 1,00 horas da madrugada, como os restaurantes, en lugar de ata as 23,00 horas. En todo caso, faríase coas mesmas esixencias que para a restauración, como a reserva previa.
Do mesmo xeito, propuxeron que os locais que instalen medidores de CO2 e se atopen en áreas con baixa incidencia de covid-19 poidan ampliar un pouco máis a súa capacidade --actualmente é dun 75% en terraza e un 50% en interior--.
Finalmente, xa no ámbito turístico, expúxose que os guías oficiais, que actualmente teñen limitados os grupos a catro persoas, poidan amplialos ata as 15, co obxectivo de ir reactivando tamén este sector.
Os hostaleiros, e en particular o Clúster Turismo de Galicia, apelaron unha vez máis, tras o encontro, á responsabilidade individual para "non dar pasos en falso" e poder manter este proceso de desescalada. Do mesmo xeito, insistiron, confían en que "se cumpran expectativas de vacinación", algo "vital para o sector" de face á tempada de verán.
