O estudantado da USC volve aos institutos para concienciar sobre o perigo das adicións

As drogas, o xogo, os videoxogos, as pantallas, as redes sociais... son moitos os abismos de adición que ameazan no día a día, e tras máis dun ano de pandemia os efectos psicolóxicos da falta de ocio pode empurrar a caer nalgún deles, segundo expertos no eido. Por esta razón, a USC vén de se implicar na prevención e concienciación do risco desta problemática facendo fincapé nun dos grupos sociais máis vulnerables: os adolescentes.

A tarefa corre ao cargo dos alumnos da materia Enfermaría da Saúde Mental, pertencente ao terceiro curso do Grao en Enfermaría da USC e coordinada pola profesora Nuria García Couceiro. Esta rapazada, que vén traballando en poñerlle freo á desinformación acerca dos trastornos aditivos e da saúde mental que sofre a poboación infanto-xuvenil da nosa contorna, interveu estas xornadas no Colexio Plurilingüe La Salle de Santiago de Compostela.

A intención de que os mozos e mozas de Educación Secundaria asocien as consecuencias negativas do consumo de sustancias aos problemas de saúde mental. “O feito de que sexan alumnos cunha media de idade de 21 anos os que realicen as intervencións, os cales son vistos como iguais polos adolescentes, engade valor á intervención en si”, explica a profesora García Couceiro. 

Concienciar da vulnerabilidade actual dos mozos e mozas fronte ás adicións e ás enfermidades mentais é a meta desta iniciativa -"pioneira" coa que se quere reivindicar a figura dos enfermeiros e enfermeiras escolares nos centros educativos, xa que son profesionais capacitadas para intervir ante necesidades individuais, grupais ou sociais cunha abordaxe biopsicosocial. A meta, conclúe García Couceiro, é que este proxecto poida perdurar ao longo dos cursos.