Santiago estrea a primeira estación intermodal de Galicia

A primeira estación intermodal de Galicia quedou oficialmente inaugurada este sábado coa posta en marcha da nova terminal de autobuses. Un proxecto dirixido pola Xunta e cuxo presidente, Alberto Núñez Feijóo, definiu como unha das dúas "cartas de presentación" da capital galega --xunto co aeroporto-- de cara ao "mellor Xacobeo da historia".

En concreto, o mandatario autonómico foi o encargado de entregar formalmente estas instalacións ao Concello nun acto no que participaron tamén a presidenta do Administrador de Infraestruturas Ferroviarias (ADIF), Isabel Pardo de Vera; a conselleira de Infraestruturas e Mobilidade, Ethel Vázquez; o alcalde de Santiago, Xosé Sánchez Bugallo; e o delegado do Goberno en Galicia, José Miñones, entre as decenas de asistentes que realizaron un percorrido polas estancias da terminal.

E é que este mesmo sábado, ao redor das seis da mañá, entrou en funcionamento a parte do complexo dedicada aos autocares e que antes se situaba en San Caetano. Este antigo emprazamento, aberto ata este mesmo venres, servirá para ampliar o complexo de oficinas centrais da Xunta e así "diminuír os custos" dos distintos edificios da Administración autonómica que están "dispersos por Santiago", tal e como explicou Feijóo.

Durante a súa intervención despois do percorrido, o presidente galego destacou que a nova estación facilitará a intermodalidade no transporte de "millóns de persoas", que cando cheguen observarán como son recibidas "con infraestruturas que vertebran Galicia, esa cidade única que entre todos estamos a construír".

"Hoxe Santiago é unha cidade mellor, unha cidade máis conectada, unha cidade máis capital", asegurou Feijóo, sen pasar por alto que esta terminal se sitúa a "uns miutos da Catedral de occidente". "É, sen dúbida, un soño para todos os composteláns e para todos os galegos", manifestou.

"UN CAMBIO RADICAL A MELLOR"

A estación de autobuses, que agora está conectada a escasos minutos coa de tren a través dunha pasarela, supuxo un desembolso autonómico de 14,5 millóns de euros, "o 80 por cento do investimento" --reivindicou o presidente--, aos que se suma o custo asumido por ADIF e o Concello para cofinanciar os accesos e a pasarela.

Todo iso para poder acometer en Santiago "un cambio radical a mellor que non ten volta atrás". "Que nos vai a pór en termos de competitividade con outras cidades de España que, lamentablemente, aínda non conseguimos", afirmou Feijóo.

A este proxecto sumou a finalización "en próximos meses" da Cidade da Cultura --co fin das obras do Edificio Fontán--, a posta en marcha do complexo turístico do Monte do Gozo e o acondicionamento dos camiños de Santiago como a folla de ruta para preparar un Ano Santo 2021-2022 que "comeza nas próximas semanas con aperturas" e con "actividades culturais masivas".

Non en balde, puxo o foco nos "novos desafíos" que debe afrontar a intermodal de Santiago no futuro próximo, como a "coordinación racional de horarios" entre os autobuses e os trens e que estes sexan "competitivos", ademais da importancia de pór en servizo a conexión de alta velocidade ferroviaria á meseta.

O AVE EN GALICIA, "ESTE ANO"

Neste sentido, a propia presidenta de ADIF reafirmouse durante a súa intervención en que "este ano", a pesar da situación de pandemia, "materializarase" a chegada e posta en funcionamento do AVE en Galicia.

É máis, Pardo de Vera reiterou o compromiso alcanzado xa polo ministro de Transportes, José Luís Ábalos, nunha recente visita a Santiago, mentres que confirmou á Xunta a próxima aprobación en Consello de Ministros da adxudicación das obras para remodelar a estación de tren, por un orzamento de 33,5 millóns de euros.

AS INTERMODAIS NAS CIDADES APUNTAN A 2024

Feijóo tamén lembrou que a Xunta prosegue cos proxectos de intermodalidade nas seis cidades galegas restantes, co obxectivo de "a finais do ano 2024" ter finalizadas todas as estacións "ou polo menos a piques de finalizar algunhas delas".

Por iso, apelou tamén á necesidade de facer "unha análise seria, rigorosa e apriorística sobre a evolución do transporte aeroportuario" unha vez todas elas sexan unha realidade.

Feijóo tamén aproveitou a presenza de representantes de distintas administracións para subliñar que a nova intermodal é froito dunha "colaboración institucional intelixente" entre Estado, Xunta e Concello.

"Insisto na cooperación. Non hai outra forma, non hai outro modelo. A centralidade na política é a política útil, o rupturismo é a política inútil. E por iso a centralidade é a que vai construíndo país e que construíu España no último medio século", abordou.