Pardo Bazán 'regresa' ao seu "pazo do recordo" de Liñares

Unha peza teatral, programada pola Deputación de Pontevedra con motivo dos actos cos que está a conmemorar o centenario da morte de Emilia Pardo Bazán, trouxo de volta á escritora coruñesa ao seu "Pazo do recordo", o Pazo lalinense de Liñares. A visita teatralizada celebrouse con aforamento reducido, por mor da pandemia, e coa presenza da presidenta da Deputación, Carmela Silva, acompañada do alcalde, Xosé Crespo.

Silva presentou esta peza, a medio camiño entre o teatro e a promoción turística, definindo a Pardo Bazán como "unha muller feminista, rebelde e poderosa, co talento necesario para tocar todas as actividades do ser humano nun tempo no que todo era moi difícil". A representación comezou ao mediodía, tras a benvida de Carmela Silva, e tivo unha hora de duración. Entre o público estaban tamén a deputada de Cultura, Victoria Alonso, e a concelleira de Cultura, Begoña Blanco.

Hoxe no Pazo de Liñares en Lalín disfrutando da visita teatralizada con Dona Emilia Pardo Bazán. A recordamos con motivo do centenario do seu pasamento. pic.twitter.com/WzyEW1IpFv

— Carmela Silva (@carmelasilva) May 30, 2021

AVISO DE AREEIRO

Por outra banda, este sábado a Deputación de Pontevedra informou da posta en marcha de novas actuacións de conservación de firmes en 64 estradas provinciais que transcorren por 28 concellos, cun investimento de 2,1 millóns de euros. Así mesmo, informou que a Estación Fitopatolóxica Areeiro, centro dependente da institución provincial, lanzou un novo aviso fitosanitario no que segue recomendando a revisión das vides fronte ao mildio, aínda que estean tratadas, así como a renovación dos tratamentos contra esta enfermidade naquelas vides que estean próximas a concluír a protección ou que xa estean fose dela.