Galicia inicia xuño con máis dun cento de pacientes Covid hospitalizados e 2.208 casos activos
Os novos contaxios mantéñense por baixo do centenar en 90 e a taxa de positividade segue nun 2%.
Por Europa Press / Redacción | SANTIAGO DE COMPOSTELA | 01/06/2021 | Actualizada ás 10:54
Galicia inicia o mes de xuño cun alivio da presión hospitalaria ao baixar a 109 os pacientes Covid ingresados, 16 menos que a xornada anterior, e con tendencia descendente dos casos activos, que se reducen a 2.208, mentres que os novos contaxios mantéñense por baixo do centenar en 90.
Segundo os datos actualizados na mañá deste martes pola Consellería de Sanidade con rexistros ata as 18,00 horas deste luns, os pacientes Covid en UCI no conxunto de Galicia descenderon a 25, seis menos, e os que permanecen noutras unidades de hospitalización a 84, dez menos.
Por áreas sanitarias, a presión hospitalaria alíviase en todas salvo nas de Ferrol e Santiago e Barbanza. Na primeira aínda que seguen dous pacientes Covid en UCI aumentan a cinco os doutras unidades --tres máis-- e na segunda continúan cinco en críticos e soben a 22 os doutras unidades --un máis--.
Por contra, na da Coruña e Cee redúcense a dous os pacientes en UCI --dous menos-- e a 14 os doutras unidades --nove menos--; mentres que na de Lugo baixan a dous o críticos --un menos-- e a nove os doutras unidades --tres menos--.
Tamén na de Ourense descenden os pacientes en UCI a catro --dous menos-- mentres seguen sete noutras unidades; na de Vigo mantéñense sete en críticos e baixan a 17 os doutras unidades --un menos--; e na de Pontevedra e O Salnés redúcense a tres os ingresados en UCI --un menos-- e a 10 os doutras unidades --un menos--.
CASOS EN DESCENSO
Os casos activos de Covid-19 no conxunto de Galicia manteñen a tendencia descendente por décima xornada consecutiva e redúcense a 2.208, que supoñen 54 menos que a xornada anterior, ao haber máis altas (142) que novos contaxios (90), ao que se engaden dous falecementos.
As infeccións activas baixan en cinco das sete áreas sanitarias: A Coruña e Cee (-35); Santiago e Barbanza (-14); Pontevedra e O Salnés (-8); Ourense (-6) e Vigo (-3); mentres que soben lixeiramente nas de Ferrol (+3) e Lugo (+9).
Así, a área sanitaria de Vigo segue á cabeza con 662 casos activos; tras a que se mantén a de Santiago e Barbanza, con 396; a da Coruña e Cee, con 367; Pontevedra e O Salnés, con 262; Lugo, cos mesmos 262; Ourense, con 164, e Ferrol peche a lista con 95.
NOVOS CONTAXIOS E PCR
En canto aos novos contaxios deste coronavirus no conxunto de Galicia continúan por baixo do centenar con 90, despois de iniciar esta semana con 76, polo que son 14 máis.
Ademais, en Galicia foron confirmados 94 positivos por Probas Diagnósticas de Infección Activa (PDIA) nas últimas 24 horas, segundo os datos publicados por Sanidade, deles 23 na área de Vigo; 20 na de Lugo; 14 na de Ourense; outros 14 na de Santiago e Barbanza; 13 na da Coruña e Cee; sete na de Pontevedra e O Salnés; e tres na de Ferrol.
En canto á taxa de positividade mantense nun dous por cento ao descender lixeiramente ao 2,27% tras iniciar a semana cun 2,45%. Así, segue por baixo do 5% que a Organización Mundial da Saúde (OMS) fixa para dar por controlada esta pandemia. A última vez que Galicia excedeu esta barreira foi o 15 de febreiro.
