A USC abre unha investigación polas palabras homófobas do profesor Neira
"Esta casa é grande e pode haber moitas opinións pero todos temos límites e os dereitos e deberes temos que cumplilos", asegura o reitor desta universidade, Juan Casares-Long.
Por Galicia Confidencial | Compostela | 27/11/2013 | Actualizada ás 19:03
A Universidade de Santiago (USC) decidiu abrir un procedemento administrativo contra o profesor Domingo Neira García. Este docente, adicou boa parte dunha das súas aulas de 'Didáctica e profesión Docente' a criticar duramente a homosexualidade, asegurou que as mulleres lesbianas teñen un Cromosoma XXX e relacionou a corrupción de menores coas "vodas gay".
"Non se lle pode acusar de pasividade a esta universidade", suliñou este mércores o reitor da USC, Juan Casares-Long, en declaracións a Galicia Confidencial. Sen embargo, evitou opinar sobre as duras declaracións de Neira --que non rectificou-- xa que, "agora hai un procedemento aberto e non se pode interferir nel".
O reitorado recibiu na mañá deste mércores o escrito dos alumnos de Primeiro de Maxisterio no que se relatan as declaracións que Neira realizou contra gays e lesbianas. "A sociedade está enferma e enganada pola homosexualidade, un tema do que xa non se pode opinar", “os homosexuais carecen de hombría e non poden educar” porque “a homosexualidade é contaxiosa” e que por iso precisamente “tampouco se pode permitir a parellas do mesmo sexo a adoptar, posto que lles pasarían o seu mal aos seus fillos”, son algúns dos argumentos que utilizou nunha discusión que se orixinou cando unha alunna fixo unha pregunta sobre a pederastia.
Procedemento que non é público
Desde ese momento, o reitorado decidiu nomear un instructor que se encargará de levar adiante ese proceso administrativo que, pode derivar, nun procedemento xudicial. "Os procedementos non son públicos e son garantistas para todas as partes e o instructor fai unha recomendación ao reitor e o reitor decidirá", apuntou Casares-Long que se amosou sorprendido polas declaracións e suliñou que "estas cuestións non soen suceder" na USC. De feito, é a primeira vez que, baixo o seu mandato, se abre un proceso administrativo deste tipo.
E que lle pode pasar ao profesor Neira?. "Pois a súa sanción pode ser de 0 a 100", indicou o reitor. É dicir, que no mellor dos casos as súas declaracións poden quedar en nada e, no peor, poden ser motivo da súa expulsión da USC e mesmo da apertura de procesos pola vía xudicial. "Isto non é habitual. É un tema que preocupa, pero na administración pública non se pode actuar no mesmo día e a universidade é eficiente e xa tomou medidas", recalcou.
Logo de todo o acontecido, Casares-Long quere precisar que este tipo de comportamentos non son "habituais" na USC. "Esta casa é grande e pode haber moitas opinións, pero a nosa función é formar persoas libres e autónomas e profesionais competentes", indicou. "Vivimos nunha sociedade democrática e todos temos límites e os dereitos e deberes todos temos que cumplilos", concluíu.
