Investigan unha segunda vida para os residuos do sector conserveiro
Un proxecto de Galicia e o Norte de Portugal busca transformalos en produtos como acedos grasos volátiles, aceites de peixe ricos en Omega 3 e hidrolizados proteicos.
Por Europa Press / Redacción | SANTIAGO DE COMPOSTELA | 26/06/2021 | Actualizada ás 13:46
Darlle unha segunda vida aos residuos do sector conserveiro. Ese é o obxectivo dun proxecto conxunto entre Galicia e norte de Portugal cuxos resultados, por agora, apuntan a un "alto potencial de negocio", segundo destacan os seus responsables.
Explícano en declaracións a Europa Press o enxeñeiro químico Álvaro Silva, do centro tecnolóxico Cetaqua, e a responsable de transferencia Noelia Vilar, da fundación empresa-universidade galega Feuga, dúas dos socios desta iniciativa, que se denomina 'Conserval' e arrincou en abril de 2019.
Enmarcado no contexto da economía circular, 'Conserval' márcase como reto desenvolver tecnoloxías para a valorización de subproductos e augas residuais do sector conserveiro en Galicia e o norte de Portugal.
En concreto, pretende transformar estas correntes sólidas e líquidas en produtos de maior valor engadido e cun potencial de negocio, como acedos grasos volátiles específicos, aceites de peixe con elevado contido en Omega 3 e hidrolizados proteicos con alto valor.
"Ata os anos 80 a xestión destes residuos era moi deficiente. A lexislación avanza e o obxectivo agora non é só limpar, senón recuperar os compoñentes", destaca Álvaro Silva desde Cetaqua. De feito, xa implantaron un prototipo nunha conserveira en Vilanova de Arousa (Pontevedra) e, aínda que o proxecto está en fase experimental, os resultados son esperanzadores.
Segundo explica Silva, dividen os traballos a tres escalas: moi pequena, con mostras que levan a laboratorio para determinar o máximo de produción posible; pequena, na que xa se fan experiencias en continuo, 24 horas durante o sete días da semana, para ver se é factible a nivel industrial; e nunha industria, como é o caso da fábrica arousá.
Pola súa banda, Feuga busca "transferir" estes resultados ao mercado. Para iso, segundo resalta Noelia Vilar, é fundamental "concienciar" tanto ao sector, que necesitará facer investimentos para implementar estas novas tecnoloxías de aproveitamento, como a outras empresas que serán as que poderán utilizar os produtos que se obteñan, e tamén ao consumidor. Todos deben ver "os beneficios a longo prazo e para o medio ambiente", segundo remarca esta responsable da fundación empresa-universidade galega.
BIOPLÁSTICOS, HERBICIDAS, COSMÉTICOS...
O que se extraia dos residuos do sector conserveiro "non chegará ao supermercado en ningún caso", segundo precisan, senón que serán elementos que se poderán empregar para confeccionar bioplásticos e herbicidas ou en ámbitos como o cosmético, o da alimentación animal ou mesmo o farmacéutico.
O reto é "conseguir calidades", posto que, por exemplo, o ácido acético que se consegue é o mesmo xa veña do petróleo ou de augas residuais. "A nivel práctico, é como beber auga da billa ou auga embotellada", apunta o enxeñeiro químico.
