Premio á Deputación de Pontevedra por ter o mellor plan do Estado para potenciar a bicicleta

O modelo de circulación de Pontevedra volve ter premio, pero neste caso é para a provincia en conxunto. A Deputación vén de recibir o galardón ‘Bikefriendly 2021’ da Rede de Cidades pola bicicleta en atención ao seu ‘Liderado e Compromiso’ --así se chama a categoría-- para impulsar o emprego da bicicleta como medio de transporte urbano. 

A Deputación queda así recoñecida pola Rede como a institución do Estado con mellor proxecto para conseguir que a xente se pase ás dúas rodas sen motor, obxectivo que queda recollido no proxecto Ágora, onde se desenvolven estas tentativas para conseguir usos alternativos ao coche particular ou mesmo o transporte público, neste caso. 

Pontevedra eríxese como número un nesta categoría tras collerlle o relevo a Sevilla, anterior galardoada, e adiantar o Concello de Barcelona ou a Deputación Foral de Bizkaia, entre un total de dez entes públicos que presentaron a súa candidatura á categoría en cuestión. O deputado responsable en Pontevedra, Uxío Benítez, amosouse satisfeito ante o recoñecemento ao plan Ágora e anunciou que este “marca o inicio doutros posibles premios”, xa que “aínda ten moito percorrido por desenvolver”.