A Xunta proporá no Real Padroado de Santiago relanzar a industria cultural e a rehabilitación de patrimonio
Román Rodríguez sitúa "a pandemia" e "a contorna política" como as causas de que este órgano non se reunise antes.
Por Europa Press / Redacción | SANTIAGO DE COMPOSTELA | 24/07/2021 | Actualizada ás 17:51
A Xunta afronta a reunión do Real Padroado de Santiago que se celebrará este domingo, coa presenza do rei Felipe V e do presidente do Goberno central, Pedro Sánchez, coas principais propostas de rehabilitar elementos patrimoniais e poder relanzar a industria cultural tras a pandemia da covid-19.
Así o explicou o conselleiro de Cultura, Educación e Universidade, Román Rodríguez, en declaracións á Radio Galega, recollidas por Europa Press, nas que explica que a convocatoria deste órgano, tras 18 anos sen reunirse, servirá para abordar un plan estratéxico para a cidade de face ao 2032.
"Hai proxectos, algúns deles xa expostos desde hai tempo por parte do Concello e outros por parte da Xunta, que entendemos que son vertebrais, que teñen un alcance supramunicipal e unha perspectiva máis galega", explicou.
En concreto, puxo o foco na rehabilitación do patrimonio. Neste contexto, referiuse especialmente a todos os bens vinculados á universidade, así como a espazos "moi emblemáticos da cidade" que "non están na améndoa histórica pero si teñen un alto valor", como son Conxo e Sar.
Ademais, Rodríguez considera que o Real Padroado pode ser unha "oportunidade para situar e relanzar as industrias culturais, tanto pola súa capacidade de creación de emprego como a proxección que fai de Galicia no exterior".
Paralelo a todo iso, o conselleiro de Cultura sinalou como "fundamentais" os diferentes camiños a Santiago: "Debemos articular e mellorar o espazo urbano polo que transcorren".
"MÁIS VALE TARDE QUE NUNCA"
Tras 18 anos sen reunirse o Real Padroado, Román Rodríguez recoñeceu que lle gustaría que "se reunise con máis frecuencia" e que se convocou "un pouco antes" para poder preparar o Xacobeo 2021. No entanto, foron "diferentes motivos", entre eles "a pandemia e a contorna política", os que o impediron.
"Vale máis tarde que nunca e esperemos que o Real Padroado sexa un pistoletazo de saída e podamos ver un compromiso do Goberno central cara ao Xacobeo, cara a Galicia e cara a Compostela", dixo o conselleiro.
