Amancio Ortega entra tamén na rede eléctrica portuguesa tras converterse en accionista da española

O fundador de Inditex, Amancio Ortega, a través da súa sociedade Pontegadea Inversiones, adquiriu unha participación do 12% no capital de Redes Enerxéticas Nacionais (REN), o operador da rede eléctrica portuguesa, valorada nuns 190 millóns de euros.

Segundo informou a compañía ao supervisor bolsista portugués (CMVM), o vehículo investidor de Ortega, o home máis rico de España, alcanzou un acordo con Mazoon -sociedade de Omán Oil- para facerse con esta participación do 12,006% en REN.

Omán Oil xa anunciara hai uns meses a súa intención de abandonar o capital da enerxética portuguesa e solicitara deixar o seu consello de administración.

Desta maneira, Ortega eríxese no segundo principal accionista do operador da rede eléctrica lusa, tan só por detrás de State Grid Corporation of China (25,0%) e por diante de Lazard (7%).

REDE ESPAÑOLA

Esta operación prodúcese despois de que este mesmo xoves se coñecese tamén a toma por Pontegadea Inversiones dunha participación do 5% en Grupo Red Eléctrica, o operador da rede eléctrica española.

Ortega é así tamén o segundo máximo accionista de Red Eléctrica, tan só por detrás do Estado, que posúe un 20% do capital a través da Sociedad Estatal de Participaciones Industriales (SEPI). O terceiro principal accionista da empresa é Blackrock, cun 3,14%.

Fontes do brazo investidor de Amancio Ortega indicaron que esta operación respondía "aos esixentes criterios que Pontegadea aplicos a todos os seus investimentos, tanto no seu negocio principal (na selección da súa carteira de activos inmobiliarios) como nos investimentos financeiros noutros sectores".

"A participación en REE supón a incorporación ao noso portfolio dun activo de calidade no que temos vocación de permanencia a longo prazo: unha compañía do sector das infraestruturas enerxéticas cunha adecuada estratexia ambiental, social e de bo goberno (ESG)", explicaron.

XA POSÚE UN 5% DE ENAGÁS

Ademais, o vehículo investidor de Amancio Ortega tamén desembarcou a finais de 2019 en Enagás, o xestor da rede gasista, coa compra dun 5% do capital por un importe de 281,63 millóns de euros nunha ampliación de capital realizada polo grupo.

Ademais destas participacións e do 59,294% en Inditex, Pontegadea conta con participacións relevantes de carácter financeiro en Telxius (9,99%).

O Grupo Pontegadea, que reúne todas as sociedades de carteira propiedade de Amancio Ortega, as súas filiais dedicadas ao negocio inmobiliario e outras participacións de carácter financeiro, pechou o exercicio 2020 cun beneficio neto de 666 millóns de euros, o que supón unha caída do 62% respecto ao exercicio precedente, a primeira na súa historia.

A firma, que se constituíu en 2001, logra este beneficio nun ano marcado pola pandemia do Covid-19 tras contabilizar 60 millóns de euros en doazóns á Fundación Amancio Ortega, segundo explicou.

Así mesmo, o brazo investidor do fundador de Inditex pechou o exercicio 2020 cunha cifra de negocio de 1.282 millóns de euros, o que supón un descenso do 43% respecto dos 2.261 millóns alcanzados un ano antes.