A Deputación de Pontevedra e o Consello regulador do Mexillón de Galicia buscan "impulsar" o sector
Carmela Silva aproveitou para reivindicar o papel das mulleres do mar na xeración de riqueza e dinamismo económico.
Por Europa Press / Redacción | SANTIAGO DE COMPOSTELA | 02/08/2021 | Actualizada ás 16:13
A presidenta da Deputación de Pontevedra, Carmela Silva, mantivo este luns unha reunión de traballo coa súa homóloga do Consello Regulador do Mexillón de Galicia, Lina Solla, na que estudaron vías de colaboración que impulsen e modernicen este sector. "Onde somos os e as mellores do mundo", asegurou Silva.
Segundo avanzou Carmela Silva, a administración provincial está disposta a colaborar cos proxectos que lidera o Consello para impulsar o crecemento económico e a creación de emprego. "Estou segura de que nos imos a entender", dixo Carmela Silva. "Xa que compartimos unha visión do mundo que nos dá o feito de ser mulleres", abundou. A mandataria provincial aproveitou a ocasión para enxalzar o papel das mulleres do mar na xeración de riqueza e dinamismo económico en Galicia ao longo da historia.
A Deputación de Pontevedra xa asinara con anterioridade outros proxectos de colaboración con este Consello Regulador e, despois desta primeira reunión, Carmela Silva anunciou que van "retomar ese traballo conxunto" nun momento no que en toda Europa "está a traballarse para facer que todos os tecidos produtivos poidan dar un salto cualitativo para seguir avanzando".
CADEA DE VALOR
A presidenta provincial fixo fincapé na necesidade de dotar ao sector do impulso necesario en toda a súa cadea de valor, desde a produción ata a comercialización.
Pola súa banda, a presidenta do Consello Regulador do Mexillón de Galicia, Lina Solla, incidiu na "demanda fantástica" que ten o bivalvo galego por ser "o mellor do mundo". "Imos facer cousas moi importantes", avanzou, xa que están en marcha iniciativas para mellorar a rastrexabilidade do produto ou reformas portuarias. "Temos que facer unha forte aposta pola calidade porque temos o mellor produto", concluíu.
Lina Solla tamén se referiu a a intención do Consello Regulador de impulsar actuacións para "minimizar a pegada do carbono e a contaminación das rías".
