Feijóo rexeita implantar un novo imposto a Madrid pola capitalidade e di que "incendia o debate territorial en España"

O presidente da Xunta, Alberto Núñez Feijóo, manifestou este venres o seu rexeitamento á proposta exposta polo presidente da Generalitat Valenciana, Ximo Puig, de implantar un novo imposto a Madrid pola súa capitalidade e expresou as súas "dúbidas" sobre a "constitucionalidade" dunha medida así.

En declaracións aos medios durante a inauguración da feira Equiocio, en Ferrol, o presidente galego afirmou que "pór un imposto a un cidadán que vive nunha Comunidade Autónoma polo simple feito de que resida nesa Comunidade", é unha formulación "de moi dubidosa constitucionalidade".

Segundo engadiu, a medida é "unha evidente equivocación, xa que se os cidadáns dunha determinada Comunidade Autónoma perciben que hai unha discriminación negativa, polo feito de vivir, nacer ou traballar nese territorio, no canto de sosegar o debate territorial en España, o que estamos a facer é incendiándoo" e engadiu que ese debate "xa está o suficientemente incendiado como para arroxar máis gasolina ao lume".

Feijóo reclamou "un pouco de acougo e de responsabilidade", xa que a decisión de que Madrid sexa capital de España "é de fai centenares de anos" e non foi tomada polos seus actuais habitantes. "Ademais, non ten ningún sentido neste momento, cando hai unha formulación de disgregación territorial no noso país, e non se pode castigar ás Comunidades que estamos a cumprir a Constitución e que estamos a ser leais", sentenciou.

O presidente da Xunta, Alberto Núñez Feijóo, en Equioco en Ferrol.. XUNTA | Fonte: Europa Press