Tres feridos en dous accidentes de circulación en Cambre e Arzúa e un atropelo en Ourense
Dous ocupantes de senllos vehículos precisaron ser liberados polos efectivos de emerxencia.
Por Europa Press / Redacción | SANTIAGO DE COMPOSTELA | 25/08/2021 | Actualizada ás 20:52
Tres persoas resultaron feridas na tarde deste mércores en tres accidentes rexistrados na rede viaria galega nas localidades de Cambre, Arzúa e Ourense.
En Cambre, o condutor dun camión tivo que ser excarcerado polos efectivos de emerxencia tras quedar atrapado no interior do seu vehículo ao impactar contra outro camión. O sinistro tivo lugar ao redor das 16,00 horas na estrada comarcal AC-214 á altura da parroquia de Cecebre, segundo informou o CIAE 112 Galicia. Efectivos de Protección Civil de Cambre e os bombeiros de Arteixo colaboraron para liberar ao condutor do camión, que foi evacuado a un centro hospitalario.
Unha hora máis tarde, dous vehículos protagonizaron un accidente de circulación en Arzúa na estrada AC-234. De novo, un dos ocupantes dos coches sinistrados tivo que ser liberado para o seu traslado a un centro hospitalario, aínda que, neste caso, non foi preciso o uso de material de excarceración.
ATROPELO EN OURENSE
Por último, unha persoa resultou ferida ao ser atropelada por un autobús na Rúa do Progreso da cidade de Ourense.
O atropelo rexistrouse minutos antes das 16,00 horas. O ferido foi evacuado a un hospital polos profesionais de Urxencias Sanitarias 061.
