A Federación Galega de Pesca pide explicacións a CHMS "inaceptable" baixada de nivel dos seus encoros

Apela ao titular da conca Miño-Sil para que aclare se estas baixadas foron notificadas e se realizaron en cumprimento da lexislación vixente.

Por Europa Press / Redacción | SANTIAGO DE COMPOSTELA | 26/08/2021 | Actualizada ás 17:48

Comparte esta noticia

A Federación Galega de Pesca e Casting demandou explicacións á Confederación Hidrográfica Miño-Sil pola "inaceptable" e "anómala" baixada de nivel dos encoros da conca, que se atopan en conxunto á metade da súa capacidade, con algúns mesmo en torno ao 25%.

O presidente da federación, Manuel Mouzo, remitiu unha carta ao presidente da CHMS, José Antonio Quiroga, na que expresa a súa preocupación polos efectos sobre fauna e flora destes espazos que carrexa a perda de auga nestes encoros.

"Esta excepcional baixada do nivel de auga embalsada, ademais de pór nestes momentos en perigo a vida das especies que nesa masa de auga habitan, tamén a pon no inmediato futuro debido á incerteza de poder garantir os caudais mínimos ecolóxicos en próximas datas", sinala na súa carta Mouzo.

Así, apelan a que a confederación aclare as circunstancias dunha baixada de nivel que cualifican de "brutal e singular", rexistrada ademais "nun curto espazo de tempo" e que deixa a cantidade de auga que albergan na actualidade a "moita distancia" da porcentaxe que presentan os encoros doutras concas.

Neste sentido, os pescadores inciden en que "non constan circunstancias excepcionais ou distintas" que expliquen o comportamento distinto que presenta a conca Miño-Sil, polo que apela ao seu titular que aclare se as baixadas de nivel foron notificadas e se realizaron en cumprimento coa lexislación vixente.

"Non sería temerario pola nosa banda falar de gravísimo atentado ao medio ambiente ao permitir que se reducise o aforamento de certos encoros ata chegar a tan so un nivel dun 13 ou 15% da súa capacidade", conclúe a federación.

Vista xeral sobre o estado do encoro de Cenza na conca Miño-Sil. Rosa Veiga - Europa Press
Vista xeral sobre o estado do encoro de Cenza na conca Miño-Sil. Rosa Veiga - Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta