Viticultores tachan de "cortoplacistas" as medidas da Xunta na Ribeira Sacra e denuncian a súa "pasividade"

A Asociación Galega de Viticultura (AGV) reclamou á Xunta que abandone as medidas cortoplacistas na Ribeira Sacra, denunciando que a falta de planificación e a pasividade da Consellería do Medio Rural agravaron unha situación xa preocupante no sector.

Desde a pandemia, a AGV advertira da caída no consumo de viños tintos e dos excedentes acumulados en moitas adegas, pero a Xunta só reaccionou cando o problema se volveu insustentable e varias adegas anunciaron que non recollerían uva, optando entón por medidas urxentes que, segundo a asociación, foron estériles e custaron máis de 400.000 euros sen solucionar o problema.

Ante esta situación, a AGV pide a creación dunha 'Mesa do Viño', un foro de diálogo e planificación que reúna a todo o sector para desenvolver propostas e medidas eficaces e duradeiras. Ademais, considera imprescindible unha estratexia seria de comercialización que inclúa unha campaña de promoción interna dos viños tintos galegos para dinamizar o consumo e aliviar a presión das adegas. Paralelamente, insiste na necesidade dunha promoción exterior para abrir novos mercados internacionais e reducir a dependencia do mercado estadounidense, que consideran inestable e insuficiente.

A asociación propón actuacións claras e realistas, como establecer contratos homologados con prezos garantidos que ofrezan seguridade e estabilidade aos produtores, tanto na Ribeira Sacra como no resto de Galicia. Tamén reclama que os prezos se fagan por encima dos custos de produción, un estudo actualizado destes custos e unha modificación da Lei da Cadea Alimentaria para mellorar as condicións do sector vitivinícola galego.