O ciclo 'Mulleres mirando ás mulleres' percorrerá Galicia rendendo homenaxe ás galegas a través das artes

O ciclo 'Mulleres mirando ás mulleres', un proxecto que une música e literatura, percorrerá varias localidades galegas para homenaxear as galegas a través das artes. Na iniciativa participan artistas como a compositora e pianista Julia Mª Dopico, Isabel Pérez Dobarro (piano), Raquel Areal Martínez (violín) e Sara Areal Martínez (violín).

O secretario xeral de Cultura, Anxo Lorenzo, participou este xoves na presentación do proxecto, que contará con catro concertos que levarán a cabo este mes de setembro nas cidades de Lugo, Ourense, Pontevedra e Ferrol, en homenaxe a figuras como Rosalía de Castro, Eugenia Osterberger, Fanny Garrido ou Maruxa Mallo, entre outras.

Lorenzo destacou que a iniciativa demostra "o potencial creativo" que ten Galicia "e a importancia que a arte, nas súas diferentes manifestacións, ten á hora de render homenaxe" ás principais figuras.

Os concertos incluirán poemas das homenaxeadas, textos creados polas intérpretes e compositoras e intervencións que expliquen as pezas musicais. As actividades empezarán o próximo día 17 deste mes en Ferrol (ás 21,00 horas no Teatro Jofre) e continuarán o día 18 en Lugo (ás 20,00 horas no Círculo das Artes) e o 24 de setembro en Ourense (ás 20,30 horas no Liceo). O ciclo pecharase o día 25 de setembro en Pontevedra (no salón nobre do Liceo Casino ás 20,30 horas).

O secretario xeral de Cultura da Xunta, Anxo M. Lorenzo, comparece no Parlamento galego | Fonte: Xoán Crespo - Xunta de Galicia.