Pontón esixe a Xunta e Goberno que salven Alu Ibérica: "Non é de recibo a pasividade"
O comité de empresa insiste en que a fábrica está "en coma" e pide tamén a intervención pública.
Por E.P. | A CORUÑA | 19/10/2021 | Actualizada ás 13:41
A portavoz nacional do BNG, Ana Pontón, esixiu a Xunta e Goberno central que se "poñan a traballar" para garantir a continuidade da fábrica de Alu Ibérica na Coruña. "Non é de recibo a pasividade e as mentiras", dixo en referencia a ambas as administracións con motivo dunha reunión con representantes do comité de empresa.
En declaracións aos xornalistas, considerou que tanto Xunta como Goberno central "se pliegan aos intereses dunha multinacional" fronte a unha situación "crítica" da fábrica. Por iso, pediulles que se poñan a traballar "man a man para salvar a produción e os empregos".
Sobre a comarca coruñesa, asegurou que se está convertendo nun "deserto industrial" e insistiu que a "alternativa" para evitar o peche da fábrica de Alu Ibérica é unha "intervención pública". "Isto é un tema de país", insistiu tamén Pontón, quen, en particular, reprochou á Xunta que estea "constantemente botando balóns fóra". Por outra banda, avanzou que a próxima semana o BNG preguntará no Parlamento galego ao conselleiro de Economía e vicepresidente segundo, Francisco Conde, que "vai facer" a Xunta para "salvar" esta fábrica.
UNHA FÁBRICA "EN COMA"
Pola súa banda, membros do comité de empresa insistiron en que se "acaba o tempo" ante a situación de inactividade na planta. "E pola contra, hai pedidos", remarcou Juan Ramón Paseiro (UGT), que instou á Xunta a axudar para pór en marcha a fábrica. "Escóndese unha vez máis", lamentou Paseiro, que pediu tamén ao Goberno central que "busque unha solución" e "cumpran as súas promesas".
"É hora de que a Xustiza interveña as contas de Alcoa e se poña a disposición dos traballadores", expuxo, ademais, Paseiro que, como outros dirixentes sindicais, solicitou a intervención pública da fábrica.
Dela, Xullo Moskowich (CIG) dixo que está "en coma" e que, por iso, a "única solución" é a intervención. Pola súa banda, Miguel Conde (CCOO) afirmou que só necesitan "que a Xunta poña as súas ferramentas, que as ten, e o Goberno de España acompañe esas ferramentas".
