O "Bono Activa Comercio" mobiliza 25 millóns en vendas en establecementos de proximidade
Feijóo afirmou que o compromiso da Xunta co sector seguirá presente o ano que vén.
Por E.P. | SANTIAGO DE COMPOSTELA | 04/11/2021 | Actualizada ás 19:09
O presidente do Goberno galego, Alberto Núñez Feijóo, subliñou que o 'Bono Activa Comercio' conseguiu unha mobilización de 25 millóns de euros en vendas nos establecementos de proximidade, "fomentando o comercio e apoiando a recuperación do sector".
No que respecta aos produtos, Feijóo destacou as vendas en pezas de vestir, con máis de 7 millóns de euros mobilizados; seguidas de calzado, artigos de pel, bolsos e maletas, con 3,38 millóns; xoguetes e artigos deportivos --2,68 millóns--, e libros, xornais e artigos de papelería --2,5 millóns--.
"Estas catro categorías supuxeron máis do 60% das vendas realizadas cos descontos do activa comercio", engadiu, para precisar, a continuación, que o programa, que finalizou o pasado 31 de outubro, pechou cun total de 5.696 establecementos adheridos e 237.398 bonos descargados.
Feijóo afirmou que este compromiso da Xunta co sector seguirá presente para o próximo ano, xa que os orzamentos para 2022 reservan un total de 25 millóns para seguir impulsando o comercio, a través de iniciativas como as destinadas a promover a transformación dixital e a modernización do comercio de proximidade.
