O Parlamento Galego bota a andar a comisión de estudo do financiamento autonómico
O órgano foi constituído este martes, aínda pendente de que as tres formacións do arco dean nomes propios para ocupala.
Por E.P. | SANTIAGO DE COMPOSTELA | 16/11/2021 | Actualizada ás 13:18
A xunta de portavoces constituíu este martes a comisión de estudo para o modelo de financiamento autonómico, un órgano que pactaron o tres formacións políticas --PPdeG, BNG e PSdeG-- por mor dunha proposición non de lei impulsada polos nacionalistas no pasado pleno. O luns 22, ás 18,30 horas, finaliza o prazo para remitir as propostas de nomes de cada grupo para a composición.
A idea é apremar os traballos ao máximo, aínda que haberá que esperar a que se constitúa e se defina o regulamento e o plan de traballo para coñecer o horizonte temporal. Por agora, hai contactos entre os grupos e, segundo a viceportavoz do BNG, Olalla Rodil, a intención é axilizalo ao máximo.
Tamén foi a condición que puxeron os populares para a constitución desta comisión de estudo. Neste sentido, o portavoz parlamentario popular, Pedro Puy, indicou xa en días pasados que este órgano debería servir para contar cunha postura conxunta e, ademais, antes de que finalice o actual período de sesións ou como moito a inicios da seguinte, como confirmou este martes.
Este mecanismo parlamentario constitúese en paralelo á reunión que manterá o presidente da Xunta, Alberto Núñez Feijóo, o vindeiro martes 23 con outro sete presidentes autonómicos en Santiago de Compostela para abordar a reforma do sistema de financiamento autonómico.
