Abanca segue expandindo o seu imperio cunha adquisición centrada en Madrid
A entidade de Escotet vén de adquirir o negocio do portugués Novo Banco S.A. en España.
Por Europa Press / Redacción | SANTIAGO DE COMPOSTELA | 30/11/2021 | Actualizada ás 13:18
Abanca e Novo Banco SA pecharon este martes a compravenda do negocio do banco portugués en España, tendo en conta que recibiu as autorizacións do Ministerio de Asuntos Económicos e da Comisión Nacional dos Mercados e a Competencia (CNMC). Con esta operación, Abanca supera os 107.000 millóns de euros de volume de negocio, e reforza o seu posicionamento en dous ámbitos de actividade prioritarios: o negocio de banca persoal e privada, así como o negocio de empresas. Esta compra é a sexta da entidade desde 2014.
O acto de firma tivo lugar na sede institucional de Abanca en Madrid, nun acto no que participou o seu presidente, Juan Carlos Escotet, e o seu conselleiro delegado, Francisco Botas, mentres que Novo Banco estivo representado polo seu conselleiro delegado, Antonio Ramalho. A adquisición, que supón a integración contable do negocio adquirido, "presenta un baixo risco de execución e mínimo consumo de capital, ao redor de 25 puntos básicos en CET1, inferior ao estimado inicialmente", apunta Abanca nun comunicado.
A entidade subliña que esta operación "robustece" o posicionamento de Abanca en España, "moi especialmente en Madrid". Reforza segmentos estratéxicos como o de empresas --especialmente na operatoria de fóra de balance e a actividade exterior--. Ademais, Novo Banco achegará potencial de crecemento en liñas como o negocio asegurador. Esta actividade atópase en pleno crecemento en Abanca tras o relanzamento da compañía de Vida e a creación de Abanca Seguros Xenerais conxuntamente con Crédit Agricole Assurances, que xa lanzou ao mercado os seus primeiros produtos propios.
