Carabuñas, “os do sabugueiros” convidan a celebrar a amizade este Nadal

Carabuñas, ou máis coñecida como “os do sabugueiro”, vén de poñer en marcha unha orixinal iniciativa para este Nadal coa que desexan cumprir un dos seus propósitos: a celebración da amizade. Para iso contaron coa colaboración das ilustradoras galegas Clara Cerviño, Xoana Almar, Luz Beloso e Ana Parada que se prestaron a transmitir a través das láminas a súa visión sobre a amizade.

As láminas incluénse nas diferentes cestas agasallo creadas especificamente para este Nadal xunto con outros produtos galegos de alimentación de gran calidade e elaborados de forma artesanal. Para a creación destes lotes a aposta segue a ser a do produto galego, ecolóxico, local e rural. As cestas, que se poden adquirir na súa tenda en liña e cuxos prezos oscilan entre os 43 e os 99 euros, son unha edición especial “coa que queremos enriquecer o alimento con produtos para a vista e para a mente”, sinalan os emprendedores Eva e Nelson, promotores do proxecto gastronómico nacido en Vilar de Santos hai nove anos.

“Gosto do Nadal galego, Gosto do rural galego” é o lema que acompañan a estas cestas baixo o paraugas de “GOSTO!”, unha imaxe que figura nos packs creados para os envíos deste Nadal. Baixo esta nova estética, con diferentes produtos gourmet e con láminas das ilustradoras devanditas, preséntanse os seguintes lotes: “Gosto das ilustradoras galegas”, “Gosto da Xoana!”, “Gosto da Cerviño!”, “Gosto da Beloso!” e “Gosto da Trave!”. 

“Con estas cestas especiais para este Nadal queremos poñer en valor o traballo das mulleres galegas que se dedican á ilustración. Son catro pero poderían ser corenta porque a calidade da ilustración galega é magnífica. E para mostra podemos ver o traballo destas catro ilustradoras que plasman o uso, a calidade e a diversidade dos seus traballos”; sinala Eva, unha das responsables de Carabuñas.

CARABUÑAS, O PROXECTO

Carabuñas naceu no ano 2012 en Vilar de Santos (Ourense) despois de dous anos de investigación sobre o sabugueiro, un arbusto que forma parte da paisaxe galega e que actualmente está esquecido tanto o seu uso como as súas propiedades. A partir da súa baga e da súa flor comezaron a elaborar diferentes produtos de xeito artesanal: cervexas, licor, marmeladas, xalea e infusións.

Ademais da elaboración de alimentos gourmet e ecolóxicos, as principais liñas de traballo de Carabuñas na actualidade son a investigación e o cultivo do sabugueiro. Eva e Nelson son os promotores deste proxecto.